ATIA ta keda preocupa cu falta di cooperacion den e periodo transitorio na waf di Aruba

Aruba

ATIA a tuma nota cu den un conferencia di prensa recien di Gobierno cu stakeholders, entre otro WEB, a yega na un punto/acuerdo cu den Augustus 2018 e prome barco cu HFO cu considerablemente menos sulphur lo yega Aruba y cu esaki implementa e plan pa inmediatamente trata na mengua e molester cu huma ta causa na Barcadera su waf pa cu esnan cu ta traha ariba e waf. Un noticia positivo pa henter Aruba, muy particular pa comercio cu ta comprende e riesgo enorme cu un waf instabil por tin pa nos economia.

Pa sorpresa di ATIA, a tuma nota cu no solamente dos siman pasa pero tambe e siman aki, Douane ta cera porta di waf di Barcadera. A compronde cu Douane ta en espera di mascara protector. E operacion di Douane ariba waf di Barcadera ta den un area cu tin minimo te ningun molester di huma. Ta cuestiona seriamente e motibo tras di e decision pa causa daño na un proceso crucial den nos pais. Specialmente den e periodo transitorio na unda cu cu gran esfuerso, solucionnan ta ariba mesa y p’esey ATIA ta condena fuertemente e accion unilateral di Douane sin previo aviso, sin duna motibo, un proceder cu mester ta inaceptabel na Aruba.

ATIA ta compronde e situacion di molester cu e huma ta causa y a sinta y delibera cu tur partner pa yuda yega na un solucion. Trahador tin derecho di traha den un ambiente bon y tur esnan envolvi den e proceso di mehoracion a duna di nan parti pa yega eynan lo mas pronto posibel. Tambe a wordo haci un yamada di parti di Prome Minister y di parti di Minister di Economia di Aruba, pa comprension y cooperacion den e fase transitorio aki, pero lamentablemente ARIA mester constata cu di parti di Douane esaki no ta e caso y lo contrario ta wordo haci. ATIA ta spera Douane realisa y ta tene na cuenta e consecuencianan cu nan accionnan tin pa nos pais Aruba.