Bario pa Bario dediká na “Mikro Fiansa” for di ofisina di KORPODEKO

Lokal

WILLEMSTAD – E djadumingu aki (15 di aprel) di 2or di mèrdia pa 5or di atardi programa Bario pa Bario lo ta dediká na e proyekto “Mikro Fiansa”.
Kòrsou ta pasando momentonan difísil, hopi empresa ta serando nan portanan i ta retirá trahadó manda kas.
No ta responsabel sinta mannan krusá i laga e situashon aki kontinuá, ta e opinion di e tim di programa Bario pa Bario, konsistiendo di Marlon Regales i Erwin Raphaëla.
Na Kòrsou nos tin hasta empresanan grandi manera hotèl, empresa di aviashon, bankonan ku tambe ta retirá trahadó, telekomunikashon (UTS i Digicell) debí ku e empresanan aki a konfrontá ku problemanan finansiero ta planiando of ya a retirá trahadó. No ta na Kòrsou solamente!
Ta parse ku ekonomia riba nivel mundial mes ta demostrando su puntonan di defisiensia i of kompliká. Pero, e konsekuensianan teribel di un ekonomia ku ta krèsh den mayoria kaso ta pa famianan ku ta kai atras i ta keda sin of ku poko entrada pa kumpli ku e obligashonnan diario.
E situashon ta pidi pa dediká atenshon sistemátikamente na partinan esensial ku ta forma e komunidat kurasoleño i aki e tim di Bario pa Bario ta pensa por ehèmpel riba barionan. No tin ningun sentido pa laga barionan sigui deteriorá, nos grado di higiena i limpiesa keda kai atras, pobresa oumentá, krímen sigui asotá e pueblo etcetera.
Pero pa por kontradesí e sirkunstansia manera deskribí mester di proyektonan pa krea trabou, proyektonan pa alsa e grado di limpiesa i higiena, anto yuda drecha nos medioambiente i naturalesa, proyektonan pa stimulá plantashon i krio di bestia ku ta mehorá kalidat di bida, proyektonan pa frena krímen i delinkuensia, proyektonan pa amplia e konfiansa entre bisiñanan, proyektonan na benefisio di hubentut, proyektonan ku ta konsentrá riba nos estado di salú, proyektonan turístiko.
Ya pa algun luna kaba KORPODEKO ta pasando den barionan ku e proyekto “Mikro Fiansa” ku tin e propósito pa selektá un ékis kantidat di suidadano na kua lo duna fiansa, guia i e preparashonnan nesesario pa lanta nan propio negoshi.
E trayekto di pasa den barionan a demostrá un rèspòns hopi grandi, pasobra suidadanonan ta akudí masalmente na e enkuentronan aki, kaminda di un forma fásil i komprendibel tur detaye ta keda spliká. Finalmente interesadonan por inskribí pa partisipashon na e proyekto. Interesante ta ku e enkuentro ta tuma lugá den un ambiente agradabel, a la estilo ‘happy hour’.
Programa Bario pa Bario e djadumingu aki tambe ta djòin e trayekto aki ku un programa realisá direktamente for di ofisina di KORPODEKO na Schottegatweg Oost 36. Na palabra lo ta direktor di KORPODEKO señor Chesron Isidora, e tim enkargá ku kordinashon di e proyekto, pero tambe minister di SOAW señor Hensley Koeiman i minister di desaroyo ekonómiko i turismo señor Steven Martina, kendenan lo forma parti di e pènel.
E atardi ta musikalmente animá pa e banda musikal Tropical Boys. Bini unu, bini tur i sòru pa bo tei di 2or pa 5or.

RIJSWIJK. Outoridatnan polisial na Ulanda a informá ku nan a detené un hòmber di 40 aña di edat ku tabata riba lisa di Interpol pa ser kapturá komo sospechoso di kontrabanda di droga.
Polisnan tabatin sospecho ku e hòmber tabata move den besindario di Den Haag i a base di nan investigashon nan a mobilisá tim Executie Vonnissen Afgestraften meskos ku Kòrsou ke introdusi pa lokalisá e hhomber.
Ayera mainta nan a lokalisé den entrada di un edifisio di apartamento i promé ku 24 ora pasa nan lo presenté dilanti di un wes-komisario pa nan trasladé mas rapido posibel di Ulanda pa Korsou.
Kòrsou a pidi ekstradishon dje sospechoso pasobra ela kometé un delito di droga pa kual e por haña hasta 6 aña di kastigu di prizon

Leave a Reply