BO NO POR HAÑA TRABOU OF BO A PERDE TRABOU SIÑA LORA MAN

Awe Sosial

WILLEMSTAD – Den ‘Casa Hilda’ den Rifwaterstraat a kontinuá ku e proyekto ‘Lora Man’, un inisiativa di Tania Ataoellah-Henriquez. Den kurason di Otrobanda, kaminda yen turista ku baha for di barkunan krusero ta kana keiru, Tania huntu ku un grupo di persona ta traha e kosnan di boka dushi di mas sukulento di Kòrsou, meskos tambe por drenta kushina i traha un bon pastechi òf partisipá den kushinamentu di un bon kuminda krioyo anto na final por kome bo propio kreashon.

Kòrsou semper a konosé e konsepto ‘Lora Man’. Esaki ta e sistema informal i hopi bia na un eskala chikí kaminda un hende ta hasi un tarea òf produsí algu ku e meta pa generá entrada pa kuida su famia na un manera desente. Sea ta kushiná kuminda pa bende ku konosínan, òf traha pasaboka i kos di boka dushi, pero tambe limpia un kurá, duna servisio di limpiesa i hopi mas.
Den e situashon ku nos pais ta pasando último tempunan tin hopi preokupashon pa hendenan ku ta pèrdè trabou for di empresanan grandi. Den e kuadro ei Tania, ku sosten di su esposo i famia Henriquez a kuminsá ‘Lora Man Experience’ pa asina duna kada yu di Kòrsou e konosementu i sosten pa sòru pa su mes i kuida di su famia na un manera desente.

Dia 22 i 23 di mei awor lo tin dia habri na Casa Hilda serka e hendenan di ‘Lora Man’.
Famia Ataoellah i Henriquez ta sumamente kontentu di por ofresé e grupo ku tin mas mester di dje, un man pa sali dilanti i para riba propio pia.

Leave a Reply