Borchi di kaya “Baden Powellweg” ta tur kibra

Lokal

WILLEMSTAD. E borchi ku karga nomber di e kaya “Baden Powellweg” na Rif ta tur kibra. Esaki tin basta tempu ku esaki ta asina. Anto pa kolmo esaki ta net e kaya kaminda miles di turista crusero ta pasa eynan. Awor ku gobiernu ta bezig ta pone number di kaya na diferente hanchi y kaya den nos sentro di ciudad ta bon pa laga drecha esaki tambe. No tin ni un kontroleur di Gobiernu ku ta kontrola sorto di kosnan aki? Unda SKO ta? Boso tin bista di e situashon nan aki den Otrobanda i ta raporta esakinan na Gobiernu? Korda ku tur dia nos boka ta yen i nos ta kana broma ku Willemstad tantu Punda i Otrobanda ta riba lista di patrimonio Mundial pero no di e manera aki. (foto Theo Vos)

Seintje so ta bai prison…. Kastigu di prizon di 3 aña pa 1 akusado mientras sobrá a sali liber.
WILLEMSTAD. Djabièrnè último (13 di yüli) wes a dikta sentensia den e kaso di 3 suidadano ku ta akusá di aktonan kastigabel kometé. Pa kuminsá subi mesa e hecho ku e trio ta sospechá di a kore ku nan outo blòkiá e vehíkulo di 2 otro persona pa kita tas ku kontenido, ranka prenda, esta kadena di oro i renchi for di nan bai kuné. Ta trata aki di un suseso ku a tuma lugá dia 2 di ougùstùs 2017. Na e okashon aki a hasi uzo di arma di kandela pa mek riba e glas di e outo, gritando ku mester habri porta di e outo, bisando: “Habri, nami e tas”. Despues di esei e trio lo mester a hasi un intento pa ranka kadena for di un dama, gritando: “Hasi lihé”. Wes mr. Edelenbos, teniendo kuenta ku e defensa sólido di abogado mr. R.A. Gonet na fabor di Farlyson Apolina i tambe argumentunan di parti di fiskal mr van Vliet na fabor di Farlyson Apolina ( 26 aña di edat), a laga esaki bai kompletamente den libertat. No tin prueba sufisiente di su kulpabilidat den e kaso aki. Sinembargo pa loke ta trata e otro dos akusadonan, esta e rumannan Norwin Seintje (24 aña di edat) i Shurowensley Seintje (22 aña di edat), ámbos ku abogado señora mr. R.S.M. Moenir Alam pa nan defensa, e akusashonnan ta ainda mas serio.

Pa kuminsá e duo aki tabata akusá di ta responsabel pa mas aktonan di ladronisia kometé. Ladronisia di un telefon mobil i pòtmòni na altura di Mambo Beach dia 10 di ougùstùs 2017. Na e okashon aki e duo atrobe lo a hasi uzo di un arma di kandela, menasando un di e víktimanan i mas aleu aplikando atrobe otro menasa pa kita telefon mobil i pòtmòni ku 350 florin, 23 dòler merikano i 300 peso for di un otro persona. Pa dia 9 di ougùstùs 2017 e duo aki tabatin otro akusashon kontra dje, esta kitamentu di kadena i telefon mobil marka Iphone. Ademas segun e dokumentonan di hustisia e rumannan ta envolví tambe den e atrako kometé dia 2 di ougùstùs 2017, kaminda a blòkia un vehíkulo pa kita propiedat di e pasaheronan. Fiskal mr. van Vliet a demandá un kastigu di prizon di 9 aña pa Norwin Seintje, siendo pa e ruman Shurowensley Seintje e fiskal a pidi un kastigu di prizon di 7 aña. Remarkabel ta ku e pruebanan ta relashoná ku publikashonnan ku a sali den un matutino, menshonando un di e akusadonan ku kabei rasta i e otro ku wowo skel, loke a kondusí e víktimanan di e atrakonan mesora na e duo di akusadonan di fam Seintje. Pero wes señora Edelenbosch no a konsiderá e pruebanan kompletamente konvinsente den e kaso di Norwin Seintje i a haña ku e tambe por bai plenamente den libertat. Final di kuenta ta únikamente Shurowensley Seintje a keda sentensiá na 3 aña di prizon, kitando e periodo ku el a pasa den aresto preventivo.

No opstante krítika fuerte di abogado Sulvaran: Estafadornan Búlgaro mester warda te 14 november pa trata nan kaso WILLEMSTAD. Dos strañero, ambos di Bulgaria, kendenan yama Gerasim Cherbev (37 aña di edat) i Anton Kumanov (41 aña di edat) a presentá djabièrnè último den sala di korte. Hustisia a akusá nan di ladronisia kometé na banko, esta transakshonnan ilegal hasí na banko pa saka e sumanan di entre otro 2700 florin antiano, 3760 dòler merikano na un banko lokal. Ta trata aki di uzo di kódigo di pin falsifiká, aplikashon di fórmula ilegal i of creditcards ku tarheta di banko ku no ta pèrtenesé na nan.
Ta fechorianan ku a sosodé durante e periodo 9 pa 12 di mart 2018. Pa e akusado Anton Kumanov ainda tin e suma di 3400 florin i 6380 dòler merikano ku ela mafia ku e mesun práktikanan aki kometé na banko.
Tratamentu di e kaso den bista di abogado mr. Eldon “Peppie” Sulvaran ta durando demasiado largu ku e riesgo ku su klientenan lo por keda perhudiká si e kastigu ku nan haña ta abou. E abogado a konkluí ku Ministerio Públiko ta prosesando di un forma totalmente robes ya ku e investigashon ta tumando demasiado tempu i ku atrobe ta pidi pa posponé tratamentu di e kaso.

Fiskal mr. van Vliet na nòmber di Ministerio Públiko a trese padilanti ku ta pendiente di resultado di e investigashon ya ku tin tur indikashon ku mas persona ta metí den e ladronisia aki. E fiskal a pidi wes pa wanta ku tratamentu di e kaso te dia 14 di novèmber binidero pa mitar di 10 di mainta den sala di korte. Abogado mr. Sulvaran a argumentá ku e fayo pa e tardansa klaramente ta sinta serka Ministerio Públiko i ku den e kaso aki ta trata di personanan totalmente isolá, kendenan no tin apsolutamente ningun kontakto ku otro hende i ta leu for di nan famia. Wes finalmente a disidí ku tratamentu di e kaso lo kontinuá dia 14 di novèmber binidero i ku e duo di Bulgaria miéntras tantu mester keda sinta i warda e fecha ku nan mester bolbe presentá den sala di korte.