Comision Fiho di Parlamento pa Asunto Economico y Finansa a reuni cu Kvk riba varios tema di interes

Aruba Awe

Siman pasa, Comision Fiho di Parlamento pa Asunto Economico y Finansa a ricibi miembronan di directiva di Camara di Comercio (Kvk) cu a pidi un reunion cu Parlamento pa por papia riba algun topico di interes.
E topiconan a ensera entre otro finansa publico, perspectiva economico, desaroyo economico pa San Nicolas, Citgo, Incubators y varios otro tema.

“Esaki tabata un reunion hopi informativo cu ta mustra e beneficio di contacto y participacion regular entre sector priva y sector publico pa por logra progeso pa nos pais y nos hendenan”, Parlamentario Daphne Lejuez a expresa. Pa San Nicolas, Camara di Comercio lo desea di mira un desaroyo economico sostenibel den industrianan nobo tecnologico y creativo. Y tambe nan ta duna nan sosten completo n’e proyecto di Ferry cu lo por ta un di e catalisadornan p’e desaroyo aki tuma lugar. ”

Aki tambe a papia di e importancia di tin cierto ley implementa, manera p.e. un ley di privacidad optimalisa cu ta cumpli cu rekisitonan di GDPR. Den e forma aki por atrae inversion y desaroyo riba nivel tecnologico, expande den areanan di e-commerce riba nivel local y tambe e uso di firma digital”, segun Parlamentario Daphne Lejuez ta subraya.

NEGOSHI MAS STABIEL
E reunion aki tabata uno sumamente interesante unda cu Camara di Comercio a comparti tambe diferente plan pa conhuntamente cu sector priva stimula e desaroyo di ‘incubators’. Mirando cu a constata cu hopi negoshi ta sera den apenas 1-2 aña di operacion – pues haciendo uzo di ‘incubators’ lo por asisti y guia empresarionan nobo cu conseho y aceso na servicionan comparti na costonan razonabel.

Parlamentario Lejuez: “P’asina den un periodo di tres aña nan por tin un negoshi mas stabiel y por continua cu esaki.”

ENTREPRENEURSHIP
Adicionalmente Camara di Comercio a comparti cu nan ta trahando cu Minister di Enseñansa riba e posibilidad di inclui entrepreneurship den curiculo escolar. P’asina promove esaki for di un edad mas jong pa stimula un atmosfera empresarial.
Ademas di esaki, a splica Parlamentarionan presente di Camara di Comercio su aporte n’e iniciativa di ley ‘Economisch Herstelwet’ di Gobierno.
Esaki ta pa por stimula nos economia y asina aki por crea mas inversion y consecuentemente mas cupo di trabou.

Leave a Reply