Despues ku ela bòikòt CBCS: Hamás Jardim mag bira Hefe di Banko Sentral!!

Lokal

…..A tuma varios luna i dianan di oranan largu pero finalmente e konklushon tei: e persona ku a kousa ku awe Banko Sentral di Kòrsou i Sint Maarten ta un ‘ruina sin prestigio’, un “puinhoop”, ta e minister ku más tantu aña ku kualke minister di Finansa di Kòrsou tabatin e banko den su kartera: José Jardim.

Komo resultado di su desinteres òf talbes hustamente su konflikto di interes ku mira riba un futuro briante, a krea un akumulashon di problema, reklamo i manipulashon den e banko imáhen di nos pais.

 

 

Naturalmente no ta Jardim só ta responsabel pa e sigur seis añanan di diskordia, desunion i ambiente di franko enemistat i odio ku a reina den seno di Banko Sentral di Kòrsou i Sint Maarten.

Den esaki e tabatin di su banda varios suheto ku awendia ta difuntu i no por refutá loke nos ta bai relatá a kontinuashon i p’esei nos lo no ni menshoná nan.

Primeramente e suhetonan ku a introdusi politika den e Hunta di Supervishon ku te órgano mas haltu den Banko Sentral i kendenan a manipulá pa purba saka yu di tera for di presidensia dje Banko pa hinka makamba aden.

Nos tin tur e detayenan ku dia i ora i na unda ku lo bin dilanti den e dianan binidero.

 

BANKI DI AKUSADO

Mirando atras riba e akumulashon di akshonnan di mala fe i aktonan di bòikotiá ku Jardim a praktiká, un persona fasilmente ta yega na e konklushon ku na lugá di premia Jardim ku un presidensia of direktorado den Banko Sentral, mester poné sinta den banki di akusado i pidié kuenta i rason pa e daño moral, di reputashon i daño finansiero ku pa su falta di atendé ku e banko, esei a kousa Pais Kòrsou.

Of alo menos pidié kuenta i rason, preferiblemente den un Enkuesta parlamentario.

Di otro banda, no  kabe duda ku suhetonan manera Glenn Sulvaran, Glenn Camelia, komisario ku nos no por menshoná pasobra nan ta difuntu, a faya barbaramente ku nan moral i étika profeshonal siguiendo mas bien ‘His Master’s Voice’ na lugá di a obra segun nan konsenshi manera nan a hura.

Un ehempel chikitu den forma di ‘voorschot’ riba e seri di relato ku lo sigi: Hunta ta tene reunion di komisario i sorpresivamente manera e proverbial konènchi ku ta sali fo’i makutu presidente – iregularmente nombrá – ta pidi pa tuma desishon pa skòrsing di presidente dje banko.

Ora splika e presidente q.e.p.d. ku no por disidi riba un punto asina importante, a sigi un monólogo stail di ‘Kom Bij Mama’ pasobra e manifestantenan ku e lider difuntu di Pueblo Soberano a organisá dilanti porta di Banko Sentral, ta wardando e rospondi ku e komisarionan ‘di Kòrsou’ a tuma desishon pa skòrs e presidente…..

Un violashon flagrante di e huramentu di tene va-y-ven di Banko Sentral sekreto i tuma desishon a base di konsenshi imparsial i sin prewisio i interes partidista i personal.

 

GERA TOTAL

Na final di su periodo komo minister di durante un periodo di sigur 6 aña, di kual un periodo ku respaldo di parlamentario ku a hòrta asiento di su partido (Sulvaran di PAR), por bisa ku tabata reina gera total entre e komisarionan desente i minister Jardim.

Un fayo mortal ku Jardim a kometé komo minister ta ku nunka ela perkurá ku e Hunta di Supervishon tabata konsisti di 7 miembro p’asina kibra un eventual empate di voto.

Ta p’esei e komisarionan ku sí a kumpli segun honor i konsenshi, a manda e minister bai fliet ora ela anunsiá ku e ta kore ku nan pasobra nunka nan a proponé kandidato.

Ela lubidá ku pa satisfasé “His Master’s Voice”, ela rechasá tur proposishon di kandidato pasobra e kandidatonan lo no tabata kompetente pe.

Su piká kardinal ta sinta den e hecho ku ela trata un instituto asina importante  manera Banko Sentral manera un ‘trapo sushi’ kaminda den su momento di pániko i miedu pa furia di Jamaloodin, ela kore solisitá i a haña empleo serka e mesun presidente ku traishoneramente ela traha pa kòrta pia di su stul despues.

Di forma oportunista ela despresiá e nombramentu komo direktor dje dependensia na Sint Maarten, pasobra a presentá un oportunidat finansieramente muchu mas atraktivo den bira sosio ku un firma di konsultent serka kual ela kaba di kumpra un programa multi-mionario.

Mala lenganan di ku ta esei tabata su komishon pasobra tur konseho riba kompra dje programa tabata negativo….

 

MINISTER VERSUS KOMISARIONAN

Praktikamente tur hende sin saber i konosementu dje kaso i kousa di Banko Sentral, a kere ku te presidente ta e piedra den e sapatu di e banko di Korsou.

E bèrdadero piedra tabata e relashon entre e minister di Finansa ‘ad saecula seculorum’ i e komisarionan ku dia tras di dia tabata hala su atenshon ku e mester move su yangadó pa kompletá e hunta di komisario pa supervisá  bon funshonamentu dje banko.

Di un forma malvado, ela persisti ku e no ta nombra i pa kolmo a faya den forma kasi kriminal di hasta tene reunion anual obligatorio di e Banko Sentral di Kòrsou i Sint Maarten.

Nos ta pousa un ratu pasobra ta hopi kos tin di konta ku ta prohibi pa lubidá.

Mañan lo tin e kapitulo riba kon e falta di a strukturá e banko promé ku Teritorio Insular Kòrsou a bira Pais Kòrsou a resultá den un pata di kabra monumental ku a stroba bon funshonamentu dje banko.

Leave a Reply