Detenshon pa ladronisia ku violensia i arma di kandela konfiská

Lokal Polisial

Djaweps 5 di aprel 2018, alrededor di 08.30 or, Sentral di Polis a risibí notifikashon di un kaso di ladronisia ku a tuma lugá den un Toko den área di Bonam .
For di un investigashon ku polis a hasi na e sitio a resultá ku algun hòmber a drenta ku arma di kandela i a menasá tur hende ku tabata den e toko. Remarkabel tabata ku un di e sospechosonan tabata un persona gordo.

Despues di nan akto nan a move bai den un outo blanku. Patruyanan a kuminsá ku un investigashon profundo i a mobilisá mesorá. Despues di un ratu polis a señalá e outo aki den área di Muizenberg. Einan a start un persiguishon i e outo di e sospechoso a dal den e outo di polis. Na momentu di e aksidente un ko-okupante a benta un arma di kandela pafó di e outo.

Den e outo polis a detené sinku (5) hòmber sospechoso. Polis a konfiská e arma di kandela, un revòlver kaliber 38 ku un di e sospechosonan a tira for di bentana di e outo. Mas aleu den e outo polis a haña i konfiská artíkulonan ku probablemente ta prosedente di e ladronisia ku violensia na e toko den Bonam ku a tuma lugá un ratu promé. Tambe polis a haña i konfiská handshun, muts, maskarada, jacketnan pretu, machete i e outo ku e sospechosonan tabata kore.

E hòmbernan sospechoso nan edat ta varia di 17 pa 27 aña. A presentá e sospechosonan dilanti di un Fiskal Ouksiliar ku a òrdena nan enkarselamentu pendiente di mas investigashon.

Leave a Reply