Djarason awor den Korte: Kaso di bida i morto ku por kosta Isla 75 mion!!

Lokal

WIKLEMSTAD – Djarason 18 di aprel sala di Korte di Hustisia lo ta esenario di un bataya legal kual su resultado por ta un ‘penalty’ di 75 mion florin ku Refineria Isla PDVSA mester paga pa algun aña ku nan a faya di kontrolá e kontaminashon ku e refineria ta produsi tur aña.
E organisashon SMOG i un grupo di habitante di barionan ku ta sufriendo pa desenas di aña kaba dje kontaminashon dje refineria, a hiba Isla dilanti i wes a stipulá ku Isla mester paga un ‘penalty’ di 75 mion florin si resultá ku nan a surpasá e nivel di kontaminashon deskontrolá repetidamente.
Isla a apelá e desishon i djarason awor ekspertonan lo krusa spada ku otro den Korte.
SMOG i e grupo di habitantenan a kontratá mr. Berti Braam pa defendé nan posishon mientras ku ekspertonan di Ulanda tambe lo ta presente pa duna wes orientashon den e kaso altamente tekniko aki.
E kaso ta realmente unu di “Do or Die” pasobra si korte dikta ku Isla mester paga 75 mion florin, no nesesariamente esei lo nifiká ku Isla lo por disidi di klap su porta sera pasobra te ainda lo tin espasio pa negoshá.
Di otro banda si Isla haña rason pa e habitantenan ku a bin ta soportá i sufri pe kontaminashon e situashon sí ta unu di “Die” manera a keda komprobá den diferente rapòrt sientifiko.
E abogado di e kontra-partido di Isla a pone beslag kaba i ta esei Isla ta bai bringa. Spesifikamente e kontaminashon durante añanan 2013 i 2014.
Den e kaso aki e beslag ta riba e superavit di kontaminashon riba aña 2014 i mester keda konstatá ku Isla a pasa e norma ku wes a stipulá ta ilegal.
Si wes haña ku e beslag tabata na su lugá, e otro alternativa pa evitá un drama na Kòrsou ta pa negoshá pago dje suma òf uzé komo menasa pa Isla tuma medida pa korehi e situashon.

Leave a Reply