Donald Trump tin planeá: Pa kastigá migrantenan legal ku a risibí yudansa sosial

Internashonal

WASHINGTON – Donald Trump simplemente no ta drumi na ningun momento so ora toka e tema di migrantenan ku sea ta legal of ilegal radika na Merka. Di akuerdo ku un komunikado emití pa e atministrashon di Donald Trump ta preparando último detayenan di un propuesta pa stroba migrantenan ku ta den e proseso pa optené nan Green Card. E atministrashon di Donald Trump kier stroba e migrantenan di e forma aki ku sea un miembro di nan famia ku ta den e proseso pa risibí su Green Card ku a hasi uso di “Obamacare” of seguro di salu infantil, risibí kupon di alimento of otro benefisionan ku gobièrnu ta ofresé ta keda konsiderá komo a falta ku lei.

Stephen Miller bosero di gobièrnu merikano a indiká ku gobièrnu merikano tin tur esnan registrá ku a probechá di e servisionan aki ku aparentemente tabata destiná solamente pa merikanonan nase na Merka. Donald Trump a splika ku no ta eksistí ku un migrante ku kier bin biba Merka por drenta di anochi pa mainta sin kontribuí ku pago di impuesto i ta pensa ku e por haña tur e benefisionan manera tabata e kaso di Obamacare, kupon di alimento pòrnada.

Donald Trump ta interesá pa esun ku kier bin biba Merka mester sòru for di prinsipio pa kontribuí ku sea invershon of paga pa su propio gastunan. E atministrashon aktual kier otorgá Green Card na solamente profeshonalnan ku por yuda e pais bai dilanti.