Ekselente idea…. Kurso di papiamentu online

Lokal

WILLEMSTAD. For di awor por siña papiamentu tambe online via www.papiamentu.online. Ta trata aki di un kurso básiko ku por sigui riba smartphone, kòmpiuter òf tablet.
E kurso akí ta pa tur hende ku ta preparando pa bin biba Kòrsou i tambe pa tur ku ta biba aki kaba i ke siña papia papiamentu pero no ke ta mará na un ora òf lugá pa nan haña e lès. Un grupo di trahadó di Kooyman aki na Kòrsou ta siguiendo e kurso na e momentu akí i nan a reakshoná entusiasmá. Folkert Vastenouw ta bisa: “Mi a kaba di wak kasi tur módulo, e kurso ta mustra bon.”
E promé kurso básiko online ta siña e kursistanan e base esensial di nos lenga. E kurso ta bai mas aleu ku djis kumindamentu, konta te dies òf siña palabra i frasenan kòrtiku. Den un total di 10 seshon ta haña splikashon tokante aspektonan manera pronunsiashon, entonashon, aksentuashon, uso di verbo, plural i hopi mas. Ta trata aki di e kurso ku Hellen Noort-Concession tin ocho aña kaba ta duna na diferente kompania, awor den forma digital.
Asistensia tékniko di e produkto 100% lokal akí, ta den man di Remco Tevreden (B-smart) i ta un reakshon riba e demanda kresiente pa kursonan digital ku ta kompleto i fleksibel ya komo e ta aksesibel 24 ora pa dia i rònt mundu. “Fin di siman último mi a pasa dor di e promé seshonnan. Mi promé reakshon ta ku nan ta komprendibel, no muchu largu i ku mi por hasi bon uso di e informashon akí.” Señor René Eversteijn di Kooyman a bisa.
(Awor ku e kurso ta un eksito den sektor privá, lo ta bon idea pa for di minister bin abou tur empleado di gobiernu sigi e kursio i prinsipalmente e parti pa siña skirbi Papiamentu manera debe ser. Demasiado biaha minister i parlamentarionan ta keda machiká nos idioma i e ta buska apoyo usando palabranan ingles pero ta tristu nota kon nos representantenan ta dominá nos idioma asina malu: red).

Leave a Reply