EKSITOSO SELEBRASHON 20 AÑA FUNDASHON PRO SOUAX

Lokal

WILLEMSTAD. Relashoná ku su di 20 aña di eksistensia Fundashon Pro Souax a organisá resientemente un siman di aktividat ekspresando gratitut na habitantenan di Souax en partikular i públiko en general ku durante 20 aña a sostené su trabou pa bario. Entre otro e fundashon a organisá un grandioso “Marshe di gratitut” durante kua habitantenan di Souax i bisindario i demas interesado por a pasa i skohe grátis artíkulonan di uzo personal i / òf di kas ku nan tin nesesidat di dje. Tambe tabatin durante siman un anochi di charla grátis riba salú, un mainta di selebrashon ku krèshnan di bario, un atardi di selebrashon ku hobennan ku ta praktiká deporte na Sentro di bario Souax i oportunidat pa habitantenan chèk grátis nan preshon, suku i peso i haña mesora splikashon di un médiko.

E siman di selebrashon a konkluí ku un resepshon kaminda den un ambiente ameno Fundashon Pro Souax a duna rekonosementu na e invitado di honor di e anochi esta sr. Ingeniero Charles Cooper.
Sr. Cooper ta e mandatario ku algun aña pasá tabata responsabel pa e proyekto di asfaltamentu di e kayanan di Souax pariba. Ta trata di e proyekto di último añanan ku mas habitantenan di Souax a apresiá.
Durante su diskurso sr. Charles Cooper a rekonosé e abilidat i konosementu di dirigentenan di Fundashon Pro Souax i a hasi un apelashon riba nan pa kompartí esaki no solamente ku futuro lidernan di e bario pero tambe ku otro organisashonnan di bario di Kòrsou. Presidente di Fundashon Pro Souax sr. Juny Sluis na su turno, den su diskurso a elaborá tantu riba e resultadonan konkreto di 20 aña di trabou di Fundashon Pro Souax pero tambe kon e fundashon ta mira futuro.

Leave a Reply