Festival ‘Un Kanto Pa Kòrsou 2018’

Sosial

Willemstad – E aña aki ta kumpli eksaktamente 10 aña ku a inisiá ku e proyekto kultural musikal balioso: “UnKanto pa Kòrsou” den kua kompositornan pa medio di nan obra musikal por ekspresá grandesa di Kòrsou den tur forma. E aña aki e festival pues ta bai pa su di 11 edishon i despues di reunionnan di konsulta ku e sektor kultural di Ministerio d Enseñansa, Siensia, Kultura i Deporte, ta bonp a nos enfatisá ku a yega e momentu pa en bèrdat nos bai influensia un pensamentu positivo di nos balor propio tantu personal komo na nivel di pais.

Ta e intenshon pa toka e piesanan aki durante hinter aña, pa asina ei nos sigui promové patriotismo den sentido mas amplio di palabra bou di pueblo. Ta bon pa radio emisoranan kuminsá toka tur e piesanan di aña pasa i añanan anterior den e dianan promé ku e festival. Riba e fecha ku nos ta selebrá Dia di Bandera 2018, manera anunsiá ariba, e komposishon ganadó i posiblemente algun invitado lo presentá dia 2 di yüli 2018 na Plasa Brion. Festival Un Kanto pa Kòrsou lo tuma lugá djadumingu 3 di yüni 2018 na Landhuis Brakkeput Mei Mei. Pa aña 2018, e komishon ta dediká Festival Un Kanto pa Kòrsou na nos gran baluerte MELA-NIA VAN DER VEEN. Melania ta ganadó di diferente festival tantu lokal komo internashonal. Un gran kantante, hopi stimá i ku un fanatikada grandi.

Inskripshon pa Un Kanto pa Kòrsou ta habri djabierne dia 4 di mei 2018 i ta klousura djabierne 11 di mei 2018 pa 5’or di atardi. E komishon lo reuní djasabra dia 12 di mei durante dia pa tuma e desishon final ken lo por bai partisipá definitivamente na e Festival. Djaluna dia 14 di mei mes lo anunsiá e lista definitivo. Ta bon pa menshoná tambe ku e komishon tur aña di nobo ta stimulá kompositornan i intérpretenan hóben pa nan tambe partisipá i midi nan forsa ku esnan mas eksperensia.

Pa un festival di kompetensia por sigui krese, ta bon pa tantu e kompositornan eksperensia i e kompositornan hóben inskribí pa por kompetí. Pues e Festival aki ta habrie posibilidat pa tur kompositor ku tin un kreashon na nivel por inskribí i partisipá. Semper bai ta bon pa e kompositornan logra konvensé un intérprete ku por trese e komposishon manera e ta deseá dilanti. Ta bon pa menshona aki ku ta kompositor, kantante ta aserka nan areglista.

E areglo ta hopi importante den e totalidat i ta bon konosí ta kua ta e areglistanan den nos komunidat ku ta apto pa hasi e trabou aki na e nivel adekuá. Espesialmente esnan ku ta bai partisipa na prome biaha komo interpreta kompositor, ta nesesario pa entregá nan dèmo ku grabashon dje piesa kanta pa e intérprete i kompañá pa un instrumènt di kuèrdè, na momentu di inskripshon. Si nan no kumpli kuesaki, nan no ta bin na remarke pa partisipá. Pa esnan ku a keda selekshoná pa e komishon, lo tin un reunion djamars dia 15 di mei 2018 na Curaçao Festival Center di 7 or pa 8 or di anochi, kaminda lo duna tur detaye di e festival. Gobièrnu di Kòrsou a opta pa tene e preis di entrada mas abou posibel i pa e motibu ei tambe Gobièrnu a duna un aporte finansiero.

Pa e festival di e magnitut aki ku nos mihó intérpretenan i nos kompositornan, kompañá pa nos orkesta nashonal, esnan interesá ta paga solamente 35 florin pa persona den benta adelantá i 45 florin na porta. E Festival ta tuma lugá di 7:30 or pa 11:10 or di anochi. Karchi ta optenibel na 24uur uit de muur, Boekhandel Samson i na Festival Center.

Leave a Reply