Homber a bin Aruba pa dera mama, y awo por bay 5 aña cera

Aruba

Diabierna Corte Penal a trata e caso contra e homber Gregorio L. Na final di aña pasa el a bini Aruba pa dera su mama, pero despues di esey cos a bay for di man y el a haya den un problema cu awor e por bay 5 aña cera, si Corte bay di acuerdo cu e demanda di Ministerio Publico.

E homber aki ta biba hopi aña caba na Merca, unda e ta traha como Junior Sous Chef y tin 5 aña, mas uno cu ta biba na Hulanda. E ta wordo acusa cu riba 3 di februari ultimo, el a trata di kita bida di un homber door di hinke; of si esey no keda proba, e ta wordo acusa subsidiariamente di intento di maltrato pisa of maltrato cu arma. Riba e fecha en cuestion el a dicidi di bay cana den caya di San Nicolas, unda cu el a topa cu un amiga di antes y cu kende e tin contacto via social media. El a mir’e ta baila cu un homber y, for di su palabranan, por a sinti cu e acusado no a gusta e situacion. El a puntr’e si e homber ey ta su guy y como esey no ta e caso el a bisa e amiga cu e kier baila cun’e mescos cu el a mir’e ta baila cu e homber. Den e discusion aki di repente a bini un señora, amiga di su amiga, y compañe di dje. A surgi un discusion, pasobra nan a bay defende e amiga di e acusado. Dado momento el a aleha y a bay cumpra un cerbes, pero a surgi un discusion atrobe te ora un amigo a dicidi ranke pa aleh’e for di e situacion.

Na caminda pa cas, pasando banda di un bar na final di caya grandi, el a topa cu nan atrobe. “Mi a bisa nan algo y nan a contestami. Pero mi no ta corda kico e tabata,” el a bisa Hues diabierna mainta. Pero Hues a mustr’e cu e victima y su compañe a bisa cu Gregorio a haci un señal cu su man na su garganta manera cu e kier bisa cu e ta bay mata e homber W. (victima). E acusado a splica cu el a dicidi di bay cas. Pero prome cu el a bay drumi, el a bay na cas di su tata, kende no tabatey y el a dicidi di bay drumi. “Ami no ta e persona cu a hinca e homber ey. Ami tabata bisti cu short blanco y un t-shirt roos,” el a bisa Hues.

E señora SJ, amiga di e victima,y algun hende mas a bisa cu e persona cu a discuti cu nan tabatin un tshirt manera color di mustard bisti. Otronan cu conoce e acusado a bisa cu su cara tabata mustra agresivo y cu e ta un persona si e bisa algo, e ta hacie. SJ a bisa cu el a mira e homber aki mas cu un biaha e anochi ey y e ta corda su cara. Como cu el a menasa nan bisando “your husband is dead tonight”, segun e testigo aki, e resto di anochi e tabata keda wak rond cada biaha. Asina dado momento su compañe a sak pa mara su veternan, banda di muraya di Carnival Village, ora cu el a mira e homber cu un cuchiu den su man. El a grit’e “Hey”, pero asina mes e homber a staca e cuchiu den heup di su compañe, esta e homber di inicial W. Despues di esaki e agresor a core y perde den e multitud carnavalesco.
E victima mes no a mira e persona pasobra e tabata di lomba p’e. Hues a bisa cu den e rapport medico falta informacion, manera no sa con grandi y profundo e hinca tabata. E victima ta bisa cu su pulmonnan a dal cera y el a keda dos siman hospital, pero esey no ta aparece den e rapport tampoco.

Gregorio tin 20 aña bibando na Merca. El a bin dera su mama y a dicidi di keda aki pasobra e kier a habri un negoshi di cuminda.
Fiscal a uza declaracion di diferente testigo pa bisa cu e delito a wordo cometi door di e acusado aki. E pareha di e victima a mir’e den su cara prome cu el a hinca W. A wordo bisa cu el a hinca e victima den area di organonan vital. E no a duna su victima chens y a hink’e ora cu e victima no por a defende su mes. E homber a keda basta den hospital pa cual e ta haya cu e “poging tot moord” a keda proba. Como cu ta trata di un “first offender”, a pidi un castigo di 5 aña.

Aki tres siman lo tin sentencia den e caso aki.

Leave a Reply