Hopi problema cu bendedornan di droga band’i hotelnan

Aruba

ORANJESTAD – Hotel y otro establecimentonan riba e strip hotelero continuamente ta haya nan mes ta core cu personanan cu ta trata di bende droga cu turistanan. Semper lo haya turista cu a busca droga pa cumpra pero e mayoria grandi no ta gusta pa wordo pusha cu e droga den nan cara. P’esey continuamente asistencia di Polis ta wordo pidi.
Diamars ultimo casi 12’or di merdia Polis di Beach ta wordo manda banda di Riu. Esaki pasobra un di e bendedornan di droga, aparentemente e mesun homber cu kende tabatin problema un dia prome, tabata trata di bende droga cu turista y despues a sconde esaki den un tas di lomba. E descripcion duna ta cu e persona aki ta bisti cu t-shirt preto, short berde di camuflahe y e schoudertas color shinishi cu preto.
Segun e persona cu a yama, el a sconde e tas aki den santo cerca di un mata banda di e di dos palo di luz den e hanchi entre Riu Palace y Hilton Resort. E informacion ta sigui bisa cu tin un Van di reparacion di airco para dilanti e mata, unda cu a sconde e droga. Dos patruya di beach a wordo manda na Palm Pier. Na e sitio a constata cu tin locker nobo cu a wordo poni y cu dos conoci di Polis tabata na e sitio.
Ta trata di e homber A., kende tabata sinta riba un banki y e homber H., kende tabata para su dilanti. E otro dos conoci di nan tabata para bou d e mata di Redsail Dive Shop. Ta tabata trata di DC y L., kende tabata drumi riba un di e ligstoelnan di beach cu tabata bou di e palo. L. tabata cuadra cu e descripcion duna na Polis. Na momento cu Polis a yega, e homber H. a cuminsa cana pa bay for di e sitio y a grit’e pa e para. E homber A. a bin para banda di DC mientras cu un di e Polisnan a cana bay direccion di H. Yegando cerca di A y DC a sinti un holo penetrante di marihuana. A controla den bisindario directo di nan y a haya un saco transparente pero bashi. E holo penetrante tabata bini di e sakito.
Nan tur a wordo listra door di un di e Polisnan. Riba e homber H a haya 460 dollar Mericano y el a bisa cu el a gana esaki den casino di Marriott, y esey ta placa pa e paga su huur. Riba niun di nan a haya algo otro.
A cuminsa controla den bisindario. Despues di busca un rato no a haya nada, ni e area unda e melder a menciona. Nan tabata casi cla, ora cu a sinti un holo penetrante for di e lockternan. A cuminsa busca rond di e lockernan. Den un buraco chikito a haya dos sakito transparente cu yerba parecido na marihuana. Na rand di e stupi di beton a haya den e santo un joint.
Tur esaki a wordo confisca.
Pa mas o menos 12’or di merdia ta presenta na warda di strandpolitie e doño di Bugaloe Bar Restaurant & Grill, esta e señora R. El a pidi presencia di Polis pasobra e kier entrega un carta na dos persona den cual ta para cu nan tin prohibicion pa yega na e negoshi ey. O sea cu nan ta wordo poni riba blacklist. Ta trata aki di e homber conoci como “Johnny Danger” y “Coco”. E motibo ta cu ambos ta ofrece droga na clientenan, ta causa molester y ta bringa cu otro. Esaki tin consecuencia negativo pa turismo di Aruba en general y pa e empresa di dje, ya cu esaki ta un bar restaurant dirigi riba turistanan.
E Polisnan a compaña e señora na Palm Pier pa evita cu cos no ta sali for di man. Solamente a topa cu “Coco”, kende a wordo informa di e situacion.

Leave a Reply