Komishon di Senado merikano interesá pa entrevista Julian Assange den kaso Russia Gate

Internashonal

WASHINGTON – Lidernan di komishon di senado merikano dirigí pa e Republikano Richard Burr i e Demókrata Mark Warner a hasi un petishon na Senado pa laga un ekipo legal di servisio di inteligensia merikano interogá Julian Assange fundador di WikiLeaks riba e tema di investigashon Russia Gate. Aparentemente segun deklarashon di Richard Burr e portal di WikiLeaks a konfirmá ku nan tin tur detaye di e kaso di Russia Gate i k uta dispuesto pa trese klaridat den esaki.

Pa esaki naturalmente e komishon di Senado merikano ta preparando un oferta pa Julian Assange a kambio di un testimonio riba lokual e sa di e kaso di Russia Gate. Esaki naturalmente ta un lus den horizonte pa Julian Assange ku algun siman tabata hopi nervioso ku e deklarashon di presidente Lenin Moreno ku a deklará ku elo no por keda na nan embahada pa semper. Si algu asin’aki mester tuma lugá manera Julian Assange pone un pia pafó di e embahada outoridatnan britániko lo pone riba un avion direkto pa Merka.

WikiLeaks a publiká koreonan elektróniko piratiá di propiedat di DNC (Democratic National Committee ) i John Podesta presidente di kampaña di Hillary Clinton. Tin indikashon ku WikiLeaks a logra piratiá e informashon aki for di servisio di inteligensia Ruso ku ta nifiká ku Julian Assange tin muchu mas informashon pa yuda Robert Mueller fiskal spesial solushoná e kaso aki. Julian Assange ne momentunan aki ta dispuesto pa será un dil pa asina logra bai Oustralia bek ku ta su pais di orígen.