Kustwacht a intercepto boto Venezolano cu droga

Aruba

ORANJESTAD – Guardacosta (Kustwacht) a intercepta un boto cu droga den fin di siman. Esaki ta un di e poconan c uta wordo intercepta.
Den oranan di anochi riba diasabra, 7 di april, e Centro di Rescate y Coordinacion di Guardacosta di Area di Caribe a seala un nave den awanan territorial di Aruba. Mesora a bati alarma na e steunpunt di Kustwacht na Aruba y mesora a saca un Super-RHIB pa identifica e nave en cuestión, cu tabata mustra manera sospechoso for di prome momento.
Ora cu e Super-RIHB tabata asercando e nave desconoci, a constata cu e no tabatin ningun iluminación di nabegacion, manera cu ta wordo exigi pa uza den oranan di anochi. E nave sin luz a wordo obliga pa para. Abordo a topa cu cuatro homber di nacionalidad desconoci.
Despues cu a tuma e personanan aki over, a transporta nan y e nave pa e post di Kustwacht na Savaneta pa un investigacion profundo. Durante e control aki, a haya abordo di e nave diferente pakete cu supuestamente narcotica.
E cuatro hombernan, di cual tur a resulta di tin nacionalidad Venezolano, a keda deteni. E nave y tur material a keda confisca. E paketenan cu e mercancianan parecido na droga y e cuatro sospechosonan a wordo entrega na Polis cu lo sigui cu e resto di investigacion.
Kustwacht a bisa cu e trabou aki ta ehempel di e bunita cooperacion entre RCC, Dash 8, e avion di patruya maritimo di Kustwacht, post di nan na Aruba y KPA cu a conduci na interceptacion di un cantidad grandi di cocaina.
Tur hende por corda cu e fin di siman tras di lomba un bota Venezolano a wordo haya pega na costa nort di Aruba. Ta ser sospecha cu no solamente el a drenta cu ilegal pero hopi probabel cu cantidad grandi di droga tambe. A mira marca manera cu e hendenan a lastra bultonan. E mercancia mester tabata basta bon pasobra nan no tabata ni preocupa di a perde un boto. Algun tempo prome tambe a haya un boto na cabes di Aruba y hasta na e ocasion ey a laga dos pakete di cocaina atras den nan pura pa huy for di e sitio.

Leave a Reply