Laboratorio mediko mester paga spesialista Naf. 40.000 pa retir’é

Lokal

WILLEMSTAD – Mañan ta hasi nèt un luna ku wes a disidi ku un laboratorio mediko na Kòrsou mester paga un spesialista di mikrobiologia un suma di 80.000 florin pasobra a kibra e akuerdo laboralmente iregularmente. E mikrobiologo ta traha pa e laboratorio lokal MLS ku ta duna servisio na institushonan mediko na Kòrsou, Aruba i Boneiru. Dia promé di aprel e mikrobiologo a firma un kontrat di trabou ku e laboratorio pa un periodo di res aña. Ora final dje periodo di 3 aña tabata na horizonte, e dos partidonan a konsultá ku otro riba un kontrat nobo pero no ku e spesialista sino ku un kompania ku e lo lanta.

Mientras esaki tabata pendiente, un empleado di MLD a pidi e spesialista un análisis pero ela kontestá ku e no por yudé pasobra su kontrat a vense dia 31 di mart i MLS no a prolongá esaki. Komo tal e no ta kai bou di nan seguro loke ta masha importante den kaso di un eror mediko. Di tur manera partidonan a firma un akuerdo pa duna servisio dia 20 di aprel ultimo pero ku a drenta na vigor ku fecha retroaktivo pa dos aña. A base dje kontrat e spesialista tabata obligá pa hasi trabou pa MLS.

E kontrat tabata pa 40.000 florin pa luna

MLS a notifiká e spesialista ku nan ke tin un sita kune dia 23 di aprel pero e spesialista a kontestá ku nan no por reuni pasobra e ta saliendo pa Madrid pa sigi pa Ulanda. Dia 30 di aprel e ta ‘dòp’ na Korsou pa ta na Boneiru dia 1 e 4 di mei pa kompromiso ku Fundashon Mariadal pero e kontakto lo sigi via kompiuter. Dia promé di mei e dos partinan a papia pa un siman despues manda bisa e spesialista ku pa su falta mester kanselá e akuerdo kune inmediatamente. Abogado dje spesialista a manda un mensahe pa gerensha dje laboratorio kaminda ela protesta kontra su retiro i na su turno e mes a kibra e akuerdo pasobra MLS a faya kune. Den korte resientemente e laboratorio a pidi wes pa finalisá e akuerdo pa presta servisio i sin paga nada.

E spesialista na su turno a pidi pa MLS pag’e te dia e kontrat kaba legalmente. MLS a argumentá ku ta inaseptabel ku despues di a firma e kontrat nobo, e spesialista a di konosé ku e no ta disponibel pa reuni dia 23 di aprel. Gerensha dje laboratorio a haña ku e tin kontrat i mester ta 24 ora na nan disposishon i pasobra ela faya a duné retiro urgente. Wes aparentemente a bai di akuerdo ku esei pasobra si den promé instansha a dikta ku e laboratorio mester paga e homber 80 mil florin plus 10 dia di salario so mester paga e spesialista. Despues di masha akusashon i reakshon, wes a ordená e laboratorio pa pag’é pa 10 dia di trabou a base di un kompensashon di 40.000 florin pa luna.