Malcontento cerca trahadonan di Casa del Mar

Aruba

Diahuebs ultimo e trahadonan di Casa del Mar a dicidi di tene un walk out bou guía di nan sindicato pa motibo cu nan no ta mira cu tin adelanto pa yega na un CAO nobo despues cu e ultimo a vence na final di 2017. Gerencia di Casa del Mar a entrega dos proposicion caba na e representante di e trahadonan, pero esaki no a haya apoya di mayoria di e empleadonan pa cual a dicidi di bay den un tipo di accion di protesta. Esaki apesar cu mayoria di e puntonan den e concepto riba mesa ta cla caba. Na prome luga ta trata di un CAO cu tin duracion di tres aña.

Segun Rudy Geerman, di FTA, kende tabata presente na e sitio cu e trahadonan, e punto cu e partidonan no por haya otro riba dje ta ora cu empleadonan cumpli 40 aña di servicio, di cual tin un grupo cu ta yegando esaki of a yeg’e caba. Pa cada tanto aña di servicio, e empleadonan ta haya un compensacion. Awo 40 aña di servicio den sector priva ta algo remarcabel pa cual nan kier un miho compensa (regalo) di loke awor ta wordo ofreci na nan. Segun a wordo bisa, e grupo cu a bay den accion ta mas o menos 70 persona, miembro y no miembro di e sindicato FTA. E biaha aki e accion ta uno cortico, pero e lo por intensifica.
El a recorda cu e unico derecho cu e trahadonan tin ta pa protesta.

Leave a Reply