Mas ku 1,800 hobensita a haña lès di defensa

Sosial

WILLEMSTAD:  Djadumingu último Bos di Hubentut a presentá un seminario ku a wòrdu bishitá dor di mas ku 250 yu muhé i nan mama.  E aña aki Banco di Caribe ta sostené e fundashon pa dos di su programanan; Kibrando Gritunan Silensioso (KGS) i Brigada di Seguridat i Formashon (BSF). Tarea di Bos di Hubentut den e programa spesífiko di KGS ta pa konsientisá komunidat riba e tópiko di abuso seksual kontra menor i hende muhe. Parti di e proseso ta  siña mucha i hóben nan derecho, esaki ta sosodé na diferente manera e.o via obranan teatral, kurso na skolnan di fundeshi i sekundario, programa na televishon i radio i konferensia pa hóben.

 

Defensa propio: Kibra  gritunan silensioso

Otro proyekto di KGS tabata lès di defensa propio pa muchanan di skol básiko. E lèsnan a keda duná durante ora di skol na ouditorio di International School of Curaçao i tambe na Sentro pa Desaroyo Israel Leito. Instruktornan Debi Steven i Sarah Robbie di Inglatera ta biaha rònt mundu pa konsientisá riba e tópiko di abuso kontra mucha i violensia doméstiko, nan ta hasi esaki gratuitamente. Durante nan estadia, nan a duna un tayer titulá ‘Action Breaks Silence’ na 20 adulto i lès di defensa propio na 1,800 hobensita den edat di 11 pa 18 aña. Ta e meta pa tur adulto ku a partisipá na e tayer sigui empoderá mas hóben na Kòrsou.  E siman di KGS a kulminá djaweps último i a resultá mashá edukativo.

 

Mester bisa ku tabata un trayekto masha eksitoso.  A konta ku partisipashon di Maria College, Sint Jozef VSBO, Gev. Lauffer School, Juan Pablo Duarte (AGO), MIL, SKAIH, Joseph Civilis, SGO Goslinga, Marnix Cas Cora, Albert Schweitzer HAVO/ VWO, SAAN/SGP i tambe AGO Montaña. Banco di Caribe ta masha orguyoso di sostené un organisashon ku ta stimulá desaroyo positivo i ta konsientisá komunidat riba un tópiko asina importante. Laga nos kòrda ku abuso di kualke forma na un mucha, por herid’é pa bida largu; kibra e gritunan silensioso.

   

Leave a Reply