Merka a manda barku bèk Korsou… Chatara radio-aktivo tabata skèiru den konteinerhaven

Lokal

WILLEMSTAD. Poko hende tabata na altura di un kaso ku a sosodé na aña 2015 na Kòrsou kaminda tonelada di material radio-aktivo tabata skèiru den Nieuwe Haven i a para algun dia riba tereno di kontainerhaven na Nieuwe Haven promé ku a deposité riba tereno di Isla.
Na momento ku esei a sosodé, ya e material ku tabata konsisti di chatara stainless steel a yega Merka te ku outoridatnan aya a duna òrdu pa retorná e barku inmediatamente pa Kòrsou pasobra e ta kontené material radio-aktivo.
Doño dje chatara Recupal N.V. a instrui su abogadonan E. Kleist i Glen Camelia pa demandá Curaçao Ports Services N.V. pasobra reportadamente CPS a stroba nan di kobra Refineria Isla mas ku un mion di daño i perwisio.
Sinembargo mr. M.F. Bonapart a desbaratá e demanda na filingrana.
E kaso a yega Korte for di ougustus di 2015 kaminda a bin sali na kla ku Refineria Isla a bende 350.000 kilo di chatara di staal ku Mancinelli Recycling N.V. pa 850 dòler pa kada mil kilo di chatara.
Mancinelli Recycling N.V. tin un filial ku yama Recupal ku na su turno a bende parti dje lote di chatara ku CMC Recycling Inc na Florida pa US$ 186.107,28.
Isla a bende e promé parti dje lote di 110.390 kilo di chatara ku Mancinelli US$ 65.679,50.
Segidamente Mancinelli a bende e chatara ku su filial Recupal.
Dia 20 di sèptèmber di 2014 CMC Recycling Inc., na Florida a informá Recupal ku e lote ta kontaminá ku radio-aktividat.
A buska un spesialista den radiashon ku a konfirmá esaki.
Seguidamente outoridatnan merikano a ordená pa manda e chatara bèk Kòrsou pasobra nan no ke material kontaminá ku radiashon riba nan teritorio i e lote a yega Kòrsou dia 3 desember 2014 i nan a deskarge riba konteinerkade sperando riba Inklaring di Duana.
Ta despues di seis dia despues ku e chatara a yega Kòrsou a informá Duana dje kontaminashon. Na mesun tempu a informá CPS, CPA, GGD, Isla i Refineria di Korsou.
Dia 11 di desèmber Duana a duna òrdu por eskrito pa Recupal bin saka nan porkeria kontaminá mientras ku e Teamleider di Post Haven a konfirmá na CPS ku riba òrdu di Duana mester manda e lote direktamente pa Isla.
A dura te dia 2 di yanuari 2015 ku Recupal a puntra Duana ki a pasa ku e lote pasobra nan a tende ku a duna òrdu pa trasladá e lote.
A informá nan ku Bonaire Transport N.V. a transporta e lote pa Isla i a manda e kuenta pa Recupal ku ta doño dje chatara.
Recupal na su turno a kobra Isla 225.353,77 florin pa transporte dje chatara for di Merka pa Korsou.
Sinembargo Recupal kier a kobra CPS tambe un suma di 2383 florin pa transporte pa hiba e material Isla.
Isla a paga Mancinelli NAf 225.353,77 via banko pero Recupal a claim CPS pa pasobra nan a laga Duana deshasí dje chatara i a laga transporta esaki pa Isla.
Wes no a sigi Recupal su abogadonan den esaki i a ordená mas bien Recupal pa paga CPS 8500 florin pe daño na kual ela someté e trahadónan di CPS ku e material kontaminá ku tabata riba waf.
Si Recupal lo apelá e veredikto di wes M.W. Scholte ta por ver…..

Leave a Reply