Mike de Meza na Evelyn Wever Croes: Cuminsa Goberna pa caba

Aruba

Partido AVP no por kere cu mientras cu e partidonan MEP, POR y RED tin 9 luna den Gobierno, ainda no ta mira algo di Gobernacion. No tin un maneho cu ta wordo mira den ningun di e Ministerionan, y mas bien ta sigui coriente di loke ta pasando rond.  Mas lamentable, pa e ex Minister di Asuntonan di Energia Mike de Meza, ta pa mira cu tur loke a wordo haci riba e tereno aki durante e ultimo 8 añanan ta bay perdi of probablemente lo wordo poni un banda door di e Gobierno aki, simplemente pasobra tabata trata di proyectonan di e Gobierno anterior.

Por ehempel, de Meza a bisa recientemente, exploracion di Gas y azeta ta un proyecto cu a bin ta traha riba dje pa casi 8 aña largo. A lague den un bon forma, cu hopi interes di diferente partner internacional, y sigur e dosnan cu ta trahando den e proyecto awo. Aña pasa hasta a tuma e decision cu lo tuma e prueba di perforacion e aña’ki den luna di mei y juni. E tabata un paso grandi den e proyecto aki. E fase aki ta un operacion cu mester a tuma luga por lo menos 3 luna. P’esey nan di AVP a keda sorprendi ora cu di repente por scucha cu den menos di un luna e compania a bin haci e trabou y a bay. “Esaki a straña AVP masha hopi mes. Na di dos luga Prome Minister no ta bisa nada. El a bisa cu ta bay dura un aña prome cu haya sa cuanto azeta y gas tin. E hendenan aki sa realmente kico nan ta bezig cun’e. Ora cu nos tabata duna informacion di cada fase nos ta bay Parlamento. E Gobierno aki ainda no a bay Parlamento cu e tema. Ora di duna rueda di prensa ta para hunto cu ehecutivonan di p.e. Repsol pa cada partido duna nan banda. Ningun dia bo por a mira un rueda di prensa pa bay specificamente riba e topico aki, di kico a haci, con largo el a dura, con e perforacion a bay, si tabatin problema, etc. Mescos cu tur otro proyecto di Gobierno anterior cu nan ta trata di kibra, kier haci mescos cos cu esun di exploracion di gas. Lo no sorprende AVP si cu tempo nan bin bisa cu no a haya nada pa cual no ta sigui cun’e. Esaki ta tipifica e Gobierno cu tin awo,” de Meza a bisa.

E ariba menciona, e politico a bisa, ta causa caida den interes di inversionistanan tambe. Asina e cifranan di Banco Central ta mustra un caida di confiansa cerca consumidor y inversionistanan. “E Gobierno ta trahando mas pa haci investigacion, ta bezig cu persecucion politico, ta bay OM pero di Gobernacion mes no tin nada. Nos ta bisa e Gobierno aki cu tin casi un aña sinta, stop cu e persecucion politico. Si bo kier investiga, hacie cuanto bo kier, si bo kier entrega keho hacie. Laga OM haci su investigacion, nan ta e expertonan, pero por fabor cuminsa goberna e pais aki. Cuminsa duna pueblo splicacion di bo maneho, cuminsa ehecuta bo maneho, cuminsa crea speransa den inversionista y pueblo cu Aruba lo bay den un bon direccion. Te dia di awe no ta mira esaki. Ta scucha solamente investigacion, hendenan cu ta wordo kita den trabou, casonan cu Gobierno ta perde den corte, hendenan cu nan kier bay cera. “Ta ridiculo cu bo ta den Gobierno y esey ta bo maneho. Locual Pueblo kier tende ta kico ta bo maneho, con ta bay drecha economia, ki proyecto tin, con ta baha prijs di awa y coriente manera a wordo priminti. A bisa cu lo bah’e cu 50% pero awo ta papia di aumento; prijs di gasolin a subi cu 25 cent, kico ta e plan riba esaki. Con ta bay baha edad di pensioen cu a priminti; con ta stop cu criminalidad, con ta baha e cantidad di accidentenan. Esaki ta locual e pueblo kier scucha di e gobernantenan,” el a bisa.