Minister a duna compania tres contract na balor di 5 miyon florin y sin ningun specificacion corecto

Aruba

Marlon Sneek miembro di fraccion di AVP en Parlamento, ta cuestiona algun documento cu a logra di pone man ariba, caminda un biaha mas ta keda demostra cu gobierno actual, no tin transparencia y ta tuma decisionnan con cu nan kier sin duna aclaracion na Parlamento, esta representantenan di pueblo.

“Den mi man mi tin un contract cu a wordo cera pa pone algun pipa pero te ainda mi a keda busca y analisa pa trata di compronde kico esaki ta contene. Na punto A nomber di e compania ta aparece; na punto B ta papia di e localidad cu ta Ser’i Teisji y e tempo pa ehecucion di e proyecto aki ta mas o menos tres luna. E prijs ta bin na C, sin cu a bisa kico ta e trabou. Pa esaki un suma di 372.886, 07 florin mester paga caminda 50% ta adelanta y e resto na final. Ta ser menciona cu e contracto aki ta basa riba leynan local. Esaki ta e contract, un par di liña (10) cu ta costa e suma di 372 mil florin, pa pone un par di pipa pa saca gas pero niun hende sa di unda y tampoco cuanto pipa, si ta 1 of 2 meter. Un contract di 372 mil florin y aki nos tin cu mustra cu enfasis, cu p’esey awe pueblo mester paga pa recoge sushi, p’esey e bracket nobo pasobra tin un hende cu mester bay djodjo 372 mil florin pa un par di pipa cu niun hende sa kico e ta, ya cu no tin ningun descripcion di kico e ta. No tin niun documento mas.”
No ta un contract a wordo firma, Sneek a bisa den su conferencia di prensa. A resulta cu e mesun compania aki ta haya dos contract mas pa uza un excavator y su operator, un ripper, cu su operator, pa 245 y 255 florin pa ora respectivamente.

Den e mesun contracto aki ta wordo menciona cu nan ta bay traha 5 biaha pa siman pa 8 ora diariamente y ta yega na 1960 florin pa dia cu ta bira 39 mil flor in pa luna y casi 240 mil florin pa e seis lunanan di cada un di e contractonan. “P’esey un hende mester paga pa e dos contractonan aki y esey ta e pueblo cu mester paga pa recoge sushi. Pues un compania ta bay strica un suma cuantioso y esaki mi a spera cu parlamentario Edgard Vrolijk ta bin papia riba dje. Pero el a prefera di cuestiona Marlon Sneek riba su preguntanan riba carta di WEB Aruba NV encuanto aumento di prijs di awa y coriente.” E Parlamentario a contesta bisando cu e ta haci e trabou pa pueblo, e ta haci e preguntanan cu ta biba den pueblo y cu tur dia e ta haya yamada y mensahe di loke ta preocupa e pueblo. “Esey ta mi trabou pasobra mi ta representa pueblo. Awor sr. Vrolijk kier cuestiona Marlon Sneek, mi tin cu bis’e cu su trabou ta pa cuestiona Gobierno, cuestiona e tipo di contractonan aki unda cu miles di florin c’un compania ta strica.”
E ariba menciona ta e motibo cu fraccion di AVP ta kere cu mester bini un reunion publico (bijeenkomst) cu e Raad van Toezicht. “Nos kier sa con e decision aki a cay pa un suma somenta di e forma aki. Nos no kier pa Minister bin conta storia; nos kier pa esnan cu a tuma e decision bin splica basa riba kico a tuma e decision y si no tabatin mas compania of otro oferta miho.”
Banda di esaki, nan a topa cu un otro conntract mas. Ta trata di un contract cu ta papia di 275 florin pa ora, pero loke cu ta hala atencion di e contract aki ta e punto J di e documento cu ta papia di e periodo di validez. E contract ta valido desde 16 di januari pa 17 di januari. Kico a pasa cu a cancela e contracto aki bek. E tipo di informacionnan aki AVP kier. E ta imposibel cu bo ta atende companianan di pais di e forma aki mescos cu a mira e Centro di Recoleccion pa fix un amigo 40 mil florin pa luna.

Y ken cu biba pariba pasa wak ta mira e autonan di SERLIMAR para eynan. No tin niun hende ey pero e ta costa e pueblo. P’esey mester bay paga pa recoge sushi. Pa cumpli cu amigonan y atende cu tipo di contractonan. “Esaki ta locual mi ta kere mester wordo cuestiona. Ta imposibel cu un compania den un habri y cera di wowo ta bay strica miles di florin. Ken a prepara e trabou, na unda of den ki plan e proyecto aki ta poni. Ki dia bo a informa pueblo of Parlamento cu bo ta bay gasta un par di miyon florin den e trabou aki. Tin mas di e contractonan straño y dudoso aki cu nos ta bay sigui pasa den nan. E stapel ta diki. Nos a haya nan diabierna y nos lo sigui lesa pa sigui informa pueblo. Aworaki enbes cu bo paga Serlimar “tipping fee”, of ta Serlimar mester bay paga “tipping fee”,” Marlon Sneek di fraccio diAVP a declara.