Minister Dangui Oduber a reuni cu TNO tocante e investigacion di e calidad di aire na HOH

Aruba

ORANJESTAD – Minister di Turismo, Salubridad Publico y Deporte, Sr. Dangui Oduber a tene un reunion sumamente positivo cu TNO na unda a wordo presenta na dje e asina yama ‘scope of work’ di parti di TNO riba con ta nan bay conduci nan investigacion na hospital encuanto e calidad di aire den e edificio di hospital.
E accion aki di parti di e mandatario di Salubridad Publico ta pa motibo cu algun siman atras tawata tin diferente incidente cu a tuma luga na hospital caminda diferente personal laborando na hospital entre otro na operatiekamer, radiologia y e botica a bay cas malo pa motibo di holonan toxico den e aire den e edificio di hospital. E titular actual encarga cu Salubridad Publico tin e siguridad di e trahadonan na hospital central. E mandatario ta bisa di ta kere cu si e trahadonan ta contento nan lo provee un miho calidad di cuido na e pashentnan y como tal nan mester wordo protegi tambe durante cu nan ta laborando diario na hospital.
Minister Dangui Oduber ta compromete su mes cu e trahadonan di hospital cu e lo haci su maximo esfuerso pa saca afo kico ta ocasionando e holonan toxico aki y unabes esaki ta conoci e lo sigura e trahadonan cu e lo instrui gerencia di hospital pa soluciona esaki pa asina garantisa nan siguridad diario na pia di trabou.

Leave a Reply