No tin nada concreto ainda cu Cheesecake Factory: Tin varios otro interesado

Aruba

Relaciona cu e publicacion ayera, encuanto cu Tony Roma’s ta sera su portanan, no ta diabierne awor, pero dia 31 di augustus, esta fin di luna benidero. Esey tabata un error di nos banda. Pa loke cu n’e sitio ey lo habri un otro fracaise, cu ta Cheesecake Factory, AWEMainta a ser informa cu no tin nada concreto ainda, ya cu tin varios otro interesado mas p’e localidad.

Pero mester admiti si cu pa loke ta negoshi di Food & Beverage den e area ey, negoshi a bira sumamente dificil. Segun un vocero no ta awor, pero for di como 5 aña pasa, a cuminsa sinti cu no tin mucho negoshi mas den e area, pa diferente factor. E.o. e caida den turismo Venezolano, cu tin su efecto.

Como cherry riba e bolo, e medida di Gobierno, cu su BBO-BAZV y BAVP, cu ta pone cu dificilmente turistanan kier paga p’e cuminda cu nan ta sirbi. Esaki no ta pa Tony Roma’s so, pero na tur negoshi di Food & Beverage, ya cu e medida di Gobierno aki a haci e cumindanan mas caro.