Pa falta di Ministerio Publiko: Despues di kondena di 7 aña Remsley Soerka a gana kaso den apelashon

Lokal

WILLEMSTAD – Mas i mas ta saliendo na kla ku Ministerio Públiko na Kòrsou ta práktikamente ku mannan na kabes pa motibu di e avalancha di kasonan di krímen ku ta asotando nos komunidat.
E trabounan ta hopi i ta manera no tin personal sufisiente pa atendé e kasonan debidamente, ademas muchu momento ta resultá ku Ministerio Públiko no ta na tempu i e dedikashon i e profeshonalismo ku tur e trabounan aki ta rekerí ta laga masha di deseá.
Ayera un biaha mas a keda demostrá den ki kataklismo ferfelu Kòrsou ta pará ku krímen, despues ku den apelashon un suidadano pa falta di preparashon sufisiente di parti di Ministerio Públiko, a regresá kas bèk fo’i prizon, ganando su kaso den apelashon.
Ta trata aki di e suidadano Remsley Soerka, kende dia 15 di novèmber 2017 a keda sentensiá pa ladronisia i atrako riba un komersiante di fam Fayad. Remsley Soerka en prinsipio a keda kondená na 7 aña di prizon serka korte di promé instansia, pero ayera el a gana su kaso den apelashon.
Ta trata aki di un atrako kometé pa 3 atrakadó dia 28 di yüli 2017, entre kendenan Remsley Soerka.
A hasi uzo di un machete pa menasá Fayad i segun e akusashon tabata pa kita e suma di 200 florin for di dje. Den e kaso aki un di e atrakadónan a pèrdè su bida dor ku polis a tir’e mata.
Skuchando e veredikto di e trio di wesnan mr. D. Radder, mr. J. De Boer i mr. G.C.C. Lewin tin tur indikashon ku e suidadano Remsley Soerka di 31 aña di edat ku ayera a gana e kaso den apelashon en realidat sigur no ta kompletamente inosente.
E tabata na e sitio i el a partisipá den e ladronisia violento, drentando den e kas Fayad i a apliká violensia i menasá. Pero, loke a keda demostrá ayera ta falta di e pruebanan konkreto i kontundente ku e akto kastigabel a keda finalisá, esta ku enbèrdat e ladronnan a hòrta e 200 florin bai kuné.
E prueba ei no tei, segun abogado mr. Alejandra, pues mester laga Remsley Soerka den pleno libertat. Remsley Soerka mes a reakshoná totalmente konfuso i sorprendí ku lo e por sali den libertat di e forma ei. Por papia aki klaramente di preparashon inkompleto i hasta parotin ku al final no a kondusí na pruebanan konkreto.

Leave a Reply