Pa fin di luna, lo tin plannan cla pa desaroyo di tereno bashi riba haf

Aruba

Despues di mudamento di haf di container for di Oranjestad pa Barcadera, Aruba Ports Authority a keda un tereno masha grandi, hunto cu esun di Free-Zone. E plan ta pa bay desaroya esaki.
Den combersacion cu ing.Jossy Figaroa, Director di APA, a bisa cu ultimo lunanan nan a bin ta traha duro riba esaki. Gobierno tabata kier pa APA haci algun adaptacion y a haci esey tambe. APA ta papia regularmente cu nan Hunta Directiva y cu Gobierno y ta mustra cu pa fin di luna aki, lo concretisa un plan, cu t’asina leu pa ser presenta na Gobierno pa haya e aprobacionnan necesario.

Segun Director di APA, ing. Jossy Figaroa, loke ta ser traha actualmente ta riba e structura, esta si ta APA ta haci e trabao completamente of ta crea un instancia banda di APA pa ehecuta e proyecto. Esaki tambe dentro di dos siman lo keda presenta na Gobierno pa nan tuma un decision.
Hecho ta cu Gobierno y APA ta pa cuminsa cu entrega di tereno proximamente. E ta algo cu lo keda masha bunita, pero e lo no bira un proyecto cu lo bay competi cu Caya Grandi. E ta algo cu nos tur lo keda contento cune.

Loke APA ta haci, no ta pa APA solamente pero pa henter Aruba. Jossy Figaroa ta spera cu hunto cu Gobierno lo bay duna un presentacion, pasobra lo pone enfasis riba desaroyo pa residencia riba e terenonan aki, banda di desaroyo comercial.
E no mester ta algo pa gana hopi placa cune, pero mester bira un proyecto cu ta genera entrada pa cubri nan gastonan.

E proyecto ta uno grandi, y segun Jossy Figaroa, nan di APA mes no ta bay construi nada riba e terenonan aki, pero e lo keda un tereno publico grandi.
APA lo bay inverti, pero den infrastructura, pero no den edificio mes. Pa bin na remarke pa un lote, lo desea pa paga cierto suma pa haya dicho tereno.

ATA ta un stakeholder grandi den esaki y si bin cu hotel mes, e lo ta un of mas boutique hotel, pero nada di high-rise, segun ing. Jossy Figaroa.