Pa terminá relashon laboral… Kompania di seguro mester paga empleado fl. 400.000

Lokal

WILLEMSTAD – Resientemente wes mr. M.W. Scholte a dikta sentensia den un kaso laboral ku un Senior Branch Manager di Life Division di e kompania di seguro Nagico a entamá kontra e empresa.
Wes a ordená Nagico pa paga e gerente regional un suma di 400.000 florin i paga su gastunan di abogado tambe.
E Senior Branch Manager tin 65 aña i tabatin 29 aña di servisio, inisialmente ne kompania di seguro BAICO ku na 2013 a keda inkorporá den Nagico.
E Manager pasa over ku tur derechi atkiri a base di su añanan di servisio pero ta dia ku a nombra un gerente general nobo, su problemanan a kuminsa i a kulminá ku ela pidi wes terminá e akuerdo laboral.
Kulminashon dje kaso ta ku dia 15 di mart ultimo wes a konsedé terminashon dje akuerdo laboral ordenando e kompania pa paga e manager e suma di 400.000 florin Bruto.
Dia e Manager a pidi pa kibra e akuerdo laboral, wes a wanta su desishon pa laga e partidonan yega na un areglo amigabel.
Na final di kuenta e Manager a pidi wes pa tuma un desishon.
Un detaye kurioso ta ku na yanuari 2014 doño di Nagico a promové e Manager pa bira Senior Branch Manager kontra un salario di NAf 10.422,= pa luna.
Na sèptèmber di 2014 e doño a nombra un General Manager nobo ne branch na Korsou i e hefe nobo a trata di tur forma pa kita e Senior Manager pasobra supuestamente negoshi a bai malu.
Ela hasi e homber un oferta pa e kita for di trabou pero e intento no a logra i mirando ku e manager nobo a hasi su bida imposibel, ela demanda Nagico.
Ora e Senior Manager no kier a kopera, e direktor nobo a pidi Sociale Zaken pa duné pèrmit pa kita e hòmber pero nan a indik’é ku esei sí ta difisil.
Tur e kos aki a pone ku e Senior Manager a bira malu i ta na kas i pa kolmo a stòp di page salario ounke ku esaki ta ilegal.
Inisialmente e Senior Manager a pidi un kompensashon di NAf 835.360,= plus 50.000 florin pe daño moral ku ela sufri.
E ‘pesterij’ a bai asina leu ku dia Nagico a bai un ofisina nobo, e Senior Manager i un otro persona só mester a keda atras den e ofisina bieu.
Loke a sigi despues ta inkreibel: e direktor nobo a bisé ku e por bin traha den e ofisina nobo pero na mesun tempu a pidi Sociale Zaken pèrmit pa kit’é for di trabou.
Despues Nagico a anulá e petishon pa retir’é pero no a duné kos pa hasi den e ofisina nobo.
Ora wes a tuma e desishon ela chèk i a ripará ku no ta bèrdat ku kos tabata baiendo malu ni ku tampoko ku e tabata bòikòt e direktor nobo.
Wes a haña ku Nagico no a aktua komo un bon doño di trabou i p’esei a dekretá pa paga e homber 400.000 florin, mas ainda pasobra na su edat e no por haña trabou mas.

Leave a Reply