Parlamentarionan Endy Croes y Edgard Vrolijk: Un bishita exitoso na Curinde cu ta maneha Freezone Corsou

Aruba

WILLEMSTAD / ORANJESTAD – Despues di un reunion maratonico di alrededor 13 ora diaranson siman pasa den Parlamento di Aruba unda a trata e Ley di LIM, Parlamentarionan Endy Croes y Edgard Vrolijk a sali mesun anochi rumbo pa Corsou unda mester a atende un serie di 4 reunion e dia siguiente. Parlamentario Endy Croes durante e conferencia di prensa a sigui bisa cu Presidente di Parlamento di Corsou William Millerson, amigo di ambos Parlamentario, hunto cu su Staff a brinda Parlamentarionan di Aruba un trato A-1.

Alaves a probecha pa reuni cu otro Parlamentarionan di Corsou, esta Ana Maria Pauletta y Jeser El Ayoubi compartiendo diferente idea. Un reunion hopi importante cu tabata riba agenda ta un reunion cu Staff di Curinde. Curinde ta maneha Freezone Corsou. Managing Director Jacqueline Jansen, Client Manager Giovanni Boekhoudt, Assistent Manager Daniel Oleana y Investment Promotion Manager Fiorina Hernandez a forma parti di e Staff cu a duna un Powerpoint presentation formidabel na e Parlamentarionan di Aruba.

Corsou a pasa den un transicion desde 2013 unda a adapta diferente ley pa por cumpli cu standardnan internacional. Den e proceso aki a inverti bastante energia pa por a haya tur hende den e mesun direccion. Parlamentarionan Endy Croes y Edgard Vrolijk ta splica cu Parlamento aki ta trahando pro-activo. Nos no ta critica y controla solamente pero ta percura pa constantemente trece ideanan lucrativo pa nos gobernantenan. Curinde ta traha den laso estrecho cu entre otro Freezone Panama y Republica Dominicana. Parlamentarionan tin e deseo pa Aruba explora pa modernisa nos Freezone, hib’e na un standard mucho mas halto y haci’e competitivo atrobe.

Corsou tin 3 Freezone cual ta un na Airport, un na Haven y un tereno industrial apunta destina pa esaki. Total e tres zonanan aki a logra crea 1500 cupo di trabou y ta aportando substancialmente na caha di gobierno. Aruba tin un oportunidad grandi pa consolida y haci Freezone un pilar extra pa economia di Aruba. Lo sondea tur posibilidad cu tur partner pa hunto traha riba e rumbo nobo pa construi dicho pilar. Endy Croes y Edgard Vrolijk a keda masha contento cu un reunion exitoso y sigur e amabilidad, trato y alaves e disponibilidad pa comparti informacion di parti di Staff di Curinde. Hunto nos lo sigui construi e brug pa futuro.

Leave a Reply