Pelea grandi entre pareha cu a separa

Aruba

ORANJESTAD – Dialuna, pa mas of menos 9’or y 45 di anochi, patruya di Santa Cruz a bay na Mega Stone Supermarket, unda cu un dama tabata wardando riba patruya p’asina bay na un parcela na Piedra Plat pa e por busca su pertenencianan.
Na caminda a drenta un yamada na warda cu ta bisa cu e señora di inicial T y su ex partner L tabata bringando. Na e sitio, cerca di Mega Stone Supermarket, polis a topa cu dos hende homber, kendenan tabata tin L. abao wanta. Aki polis a kita nan for di otro y a hinca L den auto di polis, mirando cu e tabata razo y tabata gritando contra di e dos hende hombernan aki.
Pa evita lo pio, a bisa e dos hombernan pa keda un distancia. Yegando na e cas na Piedra Plat, unda cu e pertenencianan mester a wordo piki, L. a cuminsa grita bek mirando cu ta un amigo di T. a bin busca e pertenencianan. Hopi mas despues, L. a bisa cu toch e kier a entrega keho contra di e dos hende hombernan cu segun L. a bringa cun’e. El a mustra polis un herida cu el a ricibi net bao di su wowo drechi. Den cuadro di esaki, polis a dicidi di tuma contacto cu e recherche na warda, kende a conseha L. pa bay poli prome pa control y tratamento. Tambe eynan e por a haya un declaracion medico di su heridanan y cu por trece esakinan e siguiente dia pa agrega esaki na e keho. L. a wordo baha na cas di un familiar, kende despues lo a hib’e poli.

Leave a Reply