Pep talk di Juni Millerson: Yamada pa kumpli bon ku tarea parlamentario ounke ta pa malu!

Lokal

WILLEMSTAD. Na inisio di e reunion di parlamento ayera, presidente Millerson a hasi un apelashon riba su koleganan pa komportá na altura di nan posishon komo e órgano mas haltu di pais. Ta Parlamento ta kontrolá maneho di gobièrnu, ta traha riba proyektonan di lei i tambe, huntu ku gobièrnu, aprobá esakinan. Ta parlamento ta representá pueblo komo e órgano mas haltu di pais. Parlamento tin podernan spesial pa ehersé nan tarea mas mihó posibel.

I Millerson a enfatisá serka nan ku Pueblo meresé ku nos ta representá nan di manera digno, dor di demonstrá rèspèt pa e mesun pueblo. Parlamentarionan mester ta e bon ehèmpel, dor di hasi polítika na nivel i konstruktivo, semper sostené ku echo i no insinuashonnan dudoso i sin base. No opstante kada un su diferensia polítiko, ta opvio ku pa por representá pueblo bon, nan mester respetá otro tambe den tur sentido di palabra dor di ta kritiko i tòg konstruktivo, aportando positivamente na bienestar i desaroyo di Kòrsou.

Millerson a pidi nan pa hiba un polítika positivo den parlamento dor di funshoná di un forma profeshonal. Tambe no lubidá di respetá otro su tempu, i tambe tempu di pueblo, dor di simplemente yega na ora pa reunionnan start na e ora anunsiá. Ela finalisá su ‘pep talk’ indikando ku manera nan ta kanta den nos himno “Ban duna di nos parti p’e isla prosperá, Laga nos uni forsa p’asina triunfá”, laga nan por lo ménos kuminsá biba esaki i ban demonstrá onor i lealtat na Nos patria.

Situashon ekonómiko i finansiero di pais ta leu for di loke mester ta, pues laga nan tambe komo parlamento, duna nan aporte konkreto na bahada di gastunan di nos pais. Millerson a splika ku ta tempu pa nos uni forsa p’asina huntu nos triunfá pasobra nos pueblo meresé mihó i laga nan hasi loke nan tin ku hasi komo parlamentario bon, ounke ta pa malu.

Leave a Reply