Prome Minister Wever Croes: E contracto cu CITGO ta uno bastante fuerte

Aruba

ORANJESTAD – Ayera un biaha mas Prome Minister Evelyn Wever Croes tabata na radio den e programa di Hans Geerman unda cu el a papia riba e tema di refineria.
Remarcabel tabata e noticia cu CITGO ta na Aruba pa papia cu Gobierno. E pregunta ta: ken a pidi e reunion aki? Te cu recientemente a expresa cu no por a haya e hendenan di CITGO pa reuni pasobra tur ta cera. Esaki a causa strañesa pasobra un multinacional manera CITGO no ta laga un compania bay a la deriva. Pesey e pregunta cu hopi ta haci di con Gobierno di Aruba no a sinta cu e multinacional for di momento cu nan a sinta dia 17 di november, 2018. E unico encuentro tabata esun pidi door di CITGO mes cu a bin anuncia e “slow down” di e refineria, cual tabata un encuentro hopi breve y cu no a bay den detayes.
Den e entrevista aki na radio mes por scucha e mandatario bisando di e refineria y e contracto cu Aruba a cera cu e multinacional. “E contracto aki ta uno bastante fuerte, aunke cu e no ta sirbi interes di Aruba completamente, e ta un contracto bastante fuerte.” Pues e mandatario ta indica cu e expresion aki cu e contracto di berdad a percura pa Aruba no keda perhudica si CITGO dicidi di no sigui cu e proyecto. Esey ta motibo cu, segun el a bisa, “no por cuminsa frei cu otro hende (compania) pasobra lo haya problema cu CITGO”.
Gobierno di Aruba a haci uzo di un compania di Abogado di New York, cu ta esun cu a analisa e contracto pa Gabinete Wever Croes y nan a bisa nan pa no renegocia e contracto cu ningun otro compania. Si mester haci algo, ta cu CITGO mester papia. El a indica cu Gobierno mester ta masha cauteloso pa no crea desconfiansa cu por conduci na kiebro di e contracto, unda Aruba ta perde tur e beneficionan di e contracto fuerte aki cu tin cera cu e multinacional. “E Abogadonan a bisa nos cu no ta prudente na e momentonan aki pa Gobierno di Aruba papia cu ningun persona cu ta interesa den e refineria pasobra Aruba ta mara na e contracto cu CITGO. Nos no por duna ningun indicacion cu nos ta bay kibra e contracto cu CITGO.”
Tur siman, segun el a bisa, tin un persona ta presenta interesa den tuma e refineria, pero cu esaki, no por haci nada awo pa no perde e derechonan cu Aruba tin den e contracto cera cu CITGO. “No por pone Aruba na riesgo di paga miyones y miyones na daño y perhuicio.
E delegacion cu ta na Aruba actualmente a reuni cu Refineria di Aruba cu ta un “follow up” di e encuentro unda cu a anuncia e “slow down”. Ta trata di e mesun personanan cu tabata na Aruba anteriormente pa anuncia e “slow down”. Segun por a compronde di e mandatario, e hendenan aki ta simplemente bin duna informacion di e situacion.
Mientrastanto CITGO ta cumpliendo cu paga di e impuestonan cu nan mester paga, apesar cu nan no ta den operacion. Tambe nan ta cumpliendo cu pago di huur di e instalacionnan. Definitivamente CITGO ta cumpliendo den caha di Gobierno, e mandatario a bisa.

Leave a Reply