Pueblo Soberano ta konmemorá 5 aña morto di Helmin Magno Wiels.”

Polisial

WILLEMSTAD – Riba 5 mei 2018 binidero ta kumpli 5 aña ku Helmin Magno Wiels, na un manera kruel a wòrdu asesiná na Pir di Maripampun.
Helmin tabata un hòmber ku a gana konfiansa i afekshon di e pueblo di Kòrsou. Su forma di ekspresá, tabata úniko i ounke tabatin esnan ku no tabata di akuerdo ku su forma di ekspresá, amigu i enemigu mester atmití ku el a lanta konsiensia, motivashon i speransa serka e Pueblo dor di diariamente informá, eduká, forma i konsientisá e pueblo i asina amplia su konosementu i sentido síviko, pero tambe mustr’é riba su derechi i responsabilidat.
E notisia di Helmin su asesinato te awe ta tema di diskushon den pueblo i loke ta mas komentá ta e echo ku te ainda no a sentensia esnan ku a paga.
Esaki ta pone ku ta reina un estado sikológiko di des-satisfakshon serka e pueblo i un gran parti di e pueblo no por konformá ku e realidat di su morto, loke ta kousa tambe insiguridat, suspenso i spekulashon den atmósfera na Kòrsou.
Na vários okashon, durante e 5 añanan tras di lomba, dirigentenan di Pueblo Soberano a aserka Ministerio Públiko i minister di Hustisia ku e súplika pa atendé e kaso ku mas urgensia pa yega na un klousura, pa sigurá trankilidat bou di e pueblo.
No ta sinti un sentido di urgensia serka outoridatnan, al kontrario, komentario públiko ta bisa ku ta parse manera ke laga tempu paga memoria.
P’esei direktiva di PS a organisá diferente akshon di manifestashon durante e siman di 1 te ku 6 di mei.
E aktividatnan ta:
1. For di dia 1 te ku 6 mei tur hende por buska bandera na Sede di PS pa pega na nan outo.
2. 9 di mei ta kolekshoná firma serka hinter pueblo pa urgí Ministerio Públiko i minister di Hustisia pa pone prioridat na konklushon di e kaso.
3. 4 mei ta entrega karta i lista di firma na MP i minister di hustisia.
4. 5 mei pa 5 or tin ponementu di krans na Pir Maripampun i despues tin un enkuentro solèm na Sede di PS
5. 6 mei gran Simposio?konferensha, na WTC, titulá “Sigui ke Lucha”
Invitashon ta bai na hinter Pueblo di Kòrsou pa partisipá i duna homenahe na un Gran Luchadó pa hustisia i libertat di su Pueblo.

Leave a Reply