Repsol na Aruba pa anuncia oficialmente exploracion nobo den luna di juni

Aruba

ORANJESTAD – Diamars ultimo, Minister President Evelyn Wever-Croes y su conseheronan a reuni cu representantenan di REPSOL. Durante e reunion aki e representantenan di REPSOL a splica cu aña 2018 ta un aña importante na unda lo cuminsa e fase di exploracion.
Na luna di juni e aña aki lo cuminsa exploracion na un di e cinco areanan na unda nan ta sigur cu tin gas of petroleo.
E exploracion aki lo dura seis siman. Despues di esaki lo dura algun luna pa haci e analisisnan a base di e exploracion aki. Despues di e resultado di e analisis, REPSOL lo informa Aruba si e cantidad di gas y of petroleo cu por a haya lo ta algo economicamente realisabel pa saca for di tera y cu por trece ganashi pa Aruba.

Medio ambiente.
Riba pregunta di Prome Minister di Aruba ki efecto e exploracion tin na nos medio ambiente, REPSOL a sigura Gobierno cu nan ta teniendo na cuenta tur aspecto di medio ambiente. Cu esaki nan ta referi na e proteccion di nos beachnan y percura cu e exploracion no tin impacto riba nos beachnan ni nos medio ambiente en general.

Un otro pregunta cu a wordo haci ta cu si e exploracion ta similar na esun di Groningen na Hulanda cu ta causando hopi problema pa e habitantenan. REPSOL a indica cu absolutamente esaki no ta e caso. Hulanda ta aplica ful un otro sistema di exploracion cu no por wordo haci ora ta trata di posnan den lama.

Prome Minister ta enfatisa cu esaki naturalmente tin hopi speransa cu por bin un diversificacion di economia di pais Aruba. Ta importante pa remarca cu Minister President Evelyn Wever-Croes a duna di conoce cu despues di e fase di exploracion cu ta conoci cu si tin ganashi pa Aruba di e negoshi aki, lo bin un discusion nacional pa tuma un decision di kico lo haci cu e entradanan cu lo wordo genera di e exploracion aki. Esaki ta evita tambe cu e entradanan ta bay mesora pa paga gasto. Un alternativa ta pa e ganashi bay den un fondo separa pa wordo uza den enseñansa y salubridad entre otro.

Leave a Reply