Reunion anual di Reino tokante Asuntunan Eksterior na Kòrsou

Lokal

WILLEMSTAD – Djárason 5 aprel e reunion anual tokante Relashon Eksterno di Reino (KOBB: Koninkrijksoverleg Buitenlandse Betrekkingen) ta tuma lugá na Kòrsou. Lo ta presente Minister di Asuntunan Eksterior di Hulanda Sr. Stef Blok i e Promé Ministernan di Aruba, Sint Maarten i Kòrsou.

Promé ku e reunion di Reino, Minister Blok a tene kombersashon bilateral ku e Promé Ministernan di Aruba i Sint Maarten. Na Kòrsou tambe lo tin un kombersashon bilateral ku promé minister Rhuggenaath. Den su funshon komo Minister di Asuntunan Eksterior Sr. Blok ta representá henter Reino.

E desaroyo na Venezuela i konsekuensia pa e paisnan den Karibe ta un punto èkstra di atenshon e aña aki den e reunion di Reino. Otro tópikonan ku lo bini riba mesa durante e reunion ta invershonnan internashonal, e relashon ku Union Oropeo i koperashon den region Karibe.

Riba e programa di Minister Blok tin planiá un resepshon organisá dor di Gobernador di Kòrsou S.E. Sra. George-Wout, den presensia di representantenan di sektornan sosial i privá. Minister Blok lo papia tambe ku presidente suplente di Parlamento Sra Giselle Mc William i lo bishitá Commandant der Zeemacht Brigade-Generaal Peter Jan de Vin.

Leave a Reply