Sindicatonan a sera conoci cu Hunta Directiva nobo di N.V. Elmar

Aruba

E sindicatonan cu tin representacion di empleadonan na N.V. Elmar, manera e.o. UEA, STA y Alvast ayera mainta a ser invita pa un reunion. Hopi di e dirigentenan sindical a kere cu ta pa informa nan di e avance di e investigacion cu tin, pero tambe kier sa di e status di Robert Henriquez, Director di e compania di electricidad, kende a ser manda cas pa 30 dia.

Pero e reunion aki tabata mas bien di introduccion di Hunta Directiva nobo di N.V. Elmar y tambe pa presenta e Director temporario, ShonNo Maduro. No a discuti nada di ningun investigacion, pasobra manera gerencia di N.V. Elmar mes a duna di conoce, cu mientras e investigacion ta tumando lugar, lo no divulga nada cu ningun organisacion y menos ainda cu prensa.

Si e sindicatonan a ser priminti cu asina cu e investigacionnan ta cla, N.V. Elmar mes lo fiha un fecha pa un reunion, unda nan lo haya tur informacion desea, pero awor si no tin nada pa comparti cu nan.