Tim Ennia Kòrsou su Mihó Ekipo di Trabou 2018

Awe Sosial

Riba djasabra 19 di mei, Ennia a bira ganador di e di 3 Curaçao Corporate Challenge 2018 di Rotary Club of Curaçao. E di 3 edishon a tuma lugar dilanti di un públiko animá di mas ku 1.000 persona den un stadion di SDK ku hopi ambiente. Rotary Club of Curaçao ta kalkulá ku e evento aki di fundraising lo generá alrededor di Ang. 150,000.

18 kompania i/òf organisashon a partisipá, kada unu ku un ekipo di 15 persona pa un bon kousa, ku hopi determinashon pero tòg ku un aktitut sumamente deportivo na 11 diferente reto, tur a base di ‘teamwork’ i ‘team building’. E evento a kuminsá 2’or ku inougurashon ofisial di niun hende menos ku nos héroe i deportista internashonal Churandy Martina deseando partisipanten éksito via un imagen grabá na Hulanda i pasá riba un pantaya gigantesko.

Pa 9’or di anochi a anunsiá ganadornan. E promé, di dos i di tres premio a bai respektivamente pa Ennia, laboratorio nashonal ADC, i empatá na di tres lugá Banko Sentral i Banco di Caribe. Banko Maduro MCB a gana e popular kareda di velosidat estafèt siguí pa Fundashon BAB i na di tres lugá Banco di Caribe. E kompetensia di baile tambe Ennia a gana. Finalmente e premio pa video riba facebook mas popular a bai pa Massy United. Tur video di kompania i organisashonnan ta riba página di Facebook di Rotary Club of Curaçao, huntu ku hopi potrèt I video di e evento sumamente eksitoso aki.

Fondonan rekoudá lo bai pa mihó akseso na natashon pa muchanan di Bandabou. Rotary Club of Curaçao ta yama danki na tur spònser, partisipante, boluntario, fanátiko, públiko ku a asistí i tur hende ku di kualke manera a aportá na éksito Curaçao Corporate Challenge.

Por hasi donashon ainda riba number di kuenta di MCB 895.017.06 Rotary Community Services bou di nòmber RCC CCC 2018.
Pa mas info: info@rotarycuracao.com òf Reinier de la Fuente, telefòn 510-5141

Leave a Reply