Tratamentu di kaso Koeiman i Oliana posponé pa 14 di yüni.

Lokal

WILLEMSTAD – E duo Minguelangelo Koeiman (26 aña) i Cristino Oliana (17 aña di edat) a presentá den sala di korte ayera (17 di aprel) akusá di un ladronisia kometé dia 19 di yanüari 2018 kontra di un suidadano di fam Balentina.
Ta trata aki di ladronisia di un kadena di oro bou di menasa ku arma di kandela, gritando: “para ketu, mi ta tirabu”. Klaramente a hasi aki uzo di un arma di kandela, es desir un pistol semi outomátiko, marka FEG ku 7 bala.
E menasa aki tabata dirigí tambe kontra di un suidadano mas di fam Leopold. Di tal manera e duo a logra empoderá di e kadena di oro.
Tratamentu di e kaso tabata programá pa kuminsá mitar di 10 di mainta, pero Minguelangelo Koeiman su abogado, esta señora mr. R.S.M Moenir-Alam no a presentá i asina ei e akusado no tabatin un defensa.
Riba pregunta di wes mr. D. Gruijters e akusado Minguelangelo Koeiman a kontestá bisando na palabranan kla ku e ke un abogado pa defendé su kaso. Mas aleu Minguelangelo Koeiman a konta wes ku mas of ménos 2 luna pasá abogado R.S.M Moenir-Alam a kòmbersá kuné i a pon’é na altura ku lo e buska un otro abogado pe, pero esei no a sosodé.
Fiskal señora mr. Hato Willems i wes mr. Gruijters a konkluí ku lo ta mihó trata e kaso aki konhunto, komo tal mester programá un otro fecha.
Abogado señora mr. V.S. La Fleur pa e akusado Cristino Oliana sí tabata presente i a probechá mesora pa pidi pa laga su kliente bai temporalmente den libertat, pendiente kontinuashon di tratamentu di e kaso. Wes sinembargo a rechasá e petishon ei, bisando ku lo ta un sla inaseptabel pa komunidat. Finalmente a disidí ku tratamentu di e kaso lo ta dia 14 di yüni binidero.

Leave a Reply