Unifòrm pa empleadonan di APC a bira un débakel

Lokal

WILLEMSTAD. Doño di un empresa lokal mester paga Fondo di Penshun Korsou un suma di 23.561,62 florin pa unifòrm chimbo ku nan a entrega.
Doño dje empresa ku kose unifòrm pa empresanan lokal a hiba Algemeen Pensioenfonds Curacao dilanti wes pa reklama pago pa 17 sèt di unifòrm ku nan a kose pa APC pero a sali ku sentensia ku ta nán tin ku paga APC bèk e suma ku nan a haña kaba. E manera ku wes mes a deskribi e unifòrmnan chimbo despues di a mira e fotonan ta un deskripshon líriko.

Ela konstatá ku e pañanan no tabata pas: sea e sèt di karson ku kamisa tabata muchu grandi of chikitu pa e empleado individual, e paña tabata skeef i kiel tabata muchu hanchu. Of e kamisanan tabatin manga muchu largu i e pianan di karson tabata lastra di largu ku nan tabata.
Pa konvensé wes ku e sastre sea a kue midí bon pero a kose malu of vise versa, APC a manda foto di tur e 17 empleadonan ku e unifòrm skeins-dwars na nan kurpa. Uniko manera pa resolve un situashon insólito asina tabata pa hiba e kaso korte ora diálogo a faya.
Ora e sastreria a pèrdè e kaso den promé instansia, nan a bai den apelashon pero no a yega masha leu. Wes a ordená nan paga APC tur sèn bèk plùs interes!

Ta di imagina ku e empleadonan lo a keda manera payaso na unifòrm di sirko ku kamisa ku karson skeins-dwars na nan kurpa.
E suseso aki a tuma lugá na aña 2015 pero ta awor numa e veredikto di Korte Komun di Hustisia a sali ku e sastre mester paga APC bèk mitar dje plaka ku nan a paga delantá mas 3000 florin. E kontrat tabata pa denter di 10 siman despues di a kue midí, e sastreria lo a entregá e unifòrmnan i APC a kuminsa pa depositá 20.561,62 florin ne sastre.

Tur hende a bai pasa paña na ougustus di 2015 i despues a bai pas paña 4 biaha mas. Despues ku e sastreria a entregá e unifòrmnan, APC a reklamá ku nan ta una porkeria. Nan a keda di regla e asuntu pero finalmente APC a manda bisa e sastreria ku e unifòrmnan no ta sirbi pa uso. No a kose nan segun diseño i no ta “ready to wear”. E sastreria no a reakshoná i APC a manda e unifòrmnan bèk riba kual e sastreria a hinka e kaso den man di abogado. APC a laga deurwaarder retorná e unifòrmnan pero e sastreria a ninga di tuma nan.

Enfin, a sigi un va-y-ven ku no por a kondusi na nada i e sastreria a manda bisa APC pa paga saldo dje suma. Segun e sastreria a pretendé ku nan no a desviá dje midínan pero ta e empleadonan di APC a sea gòrda of baha di peso!! I den su opinion, no por tene e sastre responsabel pa esaki. Wes a husga lo siguiente: No tin diskushon ku e sastreria a entregá e unifòrmnan na tempu.

Leave a Reply