Violencia na Aruba ta alarmante: Castigo so no ta yuda

Aruba

Cu tin violencia na Aruba ta conoci, y na tur parti mundo, pero cu e ta alarmante si e ta un preocupación grandi. Esaki a bini dilanti durante e reciente conferencia di prensa di Fundacion pa Hende Muhe den Dificultad. E conferencia a wordo teni na momento cu Aruba a conoce otro victima di violencia domestico, Anushka Tromp.

Presidente di e Fundacion sra Suzette Kock ta Abogado di profesion. Den su trabou e ta experencia hopi caso di maltrato . “Como Abogado mes, den un piket bo ta haya ¾ di e caso tin di haber cu violencia y e otro parti mayoria ta hobennan cu ta comete maltrato . Ta tristo pa mira con violento nos comunidad a bira. Nos no ta mira cu nos sociedad of hobennan ta maneha rabia ta un manera productivo . E prome reaccion den un problema, ta golpi. Hopi biaha no ta golpi cu man y ta pasa man cu kico cu nan haya. E ta causami hopi dolor y angustia, pasobra nos tambe tin yiunan creciendo den e comunidad aki. E simpel hecho cu si pasa dal un hende na schouder, e prome reaccion ta un golpi,” Kock a duna di conoce. El a agrega cu for di tempo el a cuminsa practica Abogacia, el a bin realisa e cantidad grandi di casonan di maltrato (gewoon y pisa) cu ta tumando luga na Aruba.
Tambe e Presidente a bisa cu alcohol y droga ta hunga un rol den casonan di violencia, pero e no ta e causa, of e origen di un actitud violento. E productonan aki ta kita e inhibicionnan di un persona. Pues ora cu e persona uza sea droga y alcohol ta parce cu nan berdadero personalidad ta sali.

A wordo splica den e conferencia tambe cu e leynan di Aruba ta bon. Na momento di pidi un castigo, Ministerio Publico no ta wak solamente e hecho pero tur circunstancia, henter e situacion rond di e problema. Y tur esaki ta conta ora cu pidi un castigo. E mes ta bisa cu su pensamento ta cu “e cantidad di castigo no ta haci un diferencia. Loke nos ta haci no bon ta cu ora un hende haya un sentencia, ta hinke den KIA. Ora cu cu e caba di sinta e ta sali, pero eyden no a haci nada cun’e, pa yud’e. Un persona no ta nace abusador, pero ta bira abusador. P’esey e mester haya tratamento pa ora nan sali, nan por forma parti di e comunidad.”