Wes ke mas tempu pa studia e kaso…. Kaso di famia ku a bringa ku tres polis a keda posponé

Lokal

WILLEMSTAD – Dia 26 di febrüari 2017, polisnan a tene un kòntròl preventivo i tabata nèt durante e periodo di karnaval.
E tres polisnan hasiendo nan trabou tabata Dorand, Meyer i Emerentia i nan a aserká un señora pa e kontròl, pero esaki a rabia i kuminsá zundra palabranan insolente, gritando ku e polisnan ta mariku.
Kòntròl preventivo por lo general mas bien ta kòntròlnan pa detektá si por papia di poseshon di arma di kandela i of droga. E kòntròl aki a tuma lugá na altura di Hotèl Pelikaan den Kaya Grandi di Otrobanda.
Den esaki a surgi un forsageo entre polisnan i algun persona den públiko, kaminda Giomar Leito, saliendo na defensa di su mama i tanta a gòlpia un di e agentenan polisial den wowo i kap lep, despues ku e polis a gara e mama, kende tabata gritando palabranan malu.
Aparentemente polisnan lo a kue sea tanta of mama di e akusado Giomar Leito tene na garganta.
Ayera durante tratamentu di e kaso e abogado di e akusado, señora mr. O. Lodowica, a pidi pa agregá e filmashonnan ku tin riba telefon di un di e víktimanan na e fail.
Kontra di e polisnan a keda tresé padilanti ku siendo di bui ainda polisnan a parti klòp, tantu na e sitio di e suseso mes komo den warda di polis.
E akusashonnan kontra di Giomar Leito ta di a agredí polis, no a sigui órden di outoridat i a stroba e polisnan den nan trabou.
Wes durante e sekshon den korte a para un ratu pa studia i of inspektá e imágennan riba telefon, pero no por a saka afó ku enbèrdat polisnan a bati ku klòp siendo tabatin e persona di bui kaba.
Den sala di korte e polis ku a keda agredí tabata presente i atraves di Slachtofferhulp a entregá un petishon pa daño i perwisio. Tratamentu di e kaso aki sinembargo a keda posponé pa tempu indefiní pa duna tempu pa mas investigashon.
Wes a pidi fiskal mr. Out pa laga djòin tur e grabashonnan di e suseso na e fail. Ademas e wes a pidi un prosèsverbal mas amplio.

Leave a Reply